Cavani dinhmun a la chiang rih lo

Uruguay-in France an hmachhawn hunah Portugal laka goal hnih khungtu Edison Cavani chhawr thei lo dinhmunah an ding. PSG striker Cavani hi chawn hliam vangin Portugal nen an inkhelh ṭumin lakchhuah a ni a, Les Bleus nen hian inkhel bul a ṭan ai chuan mamawh dan a zira chhawr a nih a rinawm zawk.

Amaherawhchu, Uruguay hian Luis Suarez an la nei tho a, Barcelona forward hian goal hnih chauh la khung mah se danglamna thlen thei player a nih miau avangin France tan ngaih ṭha taka awm theih a ni lo ang. Suarez hian 2014 khan an ram La Celeste chu knockout stage hruai thleng mah se group match hnuhnung bera Italian defender Giorgio Chiellini a seh avangin an hrem a, a tel loin last 16-ah Colombia an hneh lo.

Kum 2010-ah pawh Suarez hian Uruguay hi semifinal a hruai thleng a, amaherawhchu quarterfinal-a Ghana an hneh ṭumin an lama goal lut tur chu a kutin a beng thla a, final khel tur zawnaah inlan ve thei loin Netherlands an hneh lo.

Kum 31 mi Suarez hian club tana a khelh pui Samuel Umtiti a hmachhawn dawn a, French midfielder Blaise Matuidi leh Uruguayan midfielder Rodrigo Bentacur te chu Juventus tana khel an ni bawk. South America leh Europe ram inkhel tur ni mah se ram pahnih player-te hi an inhrechiang khawp ang le.