Juventus-in Ronaldo lakluh an tum

World Cup aṭanga pet­chhuah an nih hnu lawkah Cristiano Ronaldo-a'n chanchin thar a nei lehnghal a, chu chu Italian champion Juventus nen indawrna an neih thu a ni.

Champions League final-a Liverpool an hneh hnu lawka a hma hun a chian loh thu sawitu hi Juve chuan pound maktaduai 88-in lakluh an inhuam a, season thar Serie A-ah kan hmu a nih pawhin a mak lo ang.

Juve hian Ronaldo hi an lalut thei a nih chuan an club chanchina player manto ber a ni dawn tihna a ni a, kum 2016-a Argentina forward Gonzalo Higuain lalut tura pound maktaduai 79 an lo insen tawh chu a rawn khum dawn tihna a ni.

Ronaldo leh buaina!
Kum 33 mi forward hian Real Madrid tan inelna hrang hrangah match 438 khelin goal 450 ngawt a khung sak a, La Liga-ah vawi hnih champion puiin Champions League-ah vawi li a champion pui bawk.

Portugal captain sulhnu enin Santiago Bernabeu-ah ropui viau mah se season tin deuh thawaa 'buaina' a ken tel hi Real thuneituten an 'hne' ve tawh niin an sawi a, Real president Florentino Perez nen an inkar a ṭha lo bawk.

Champions League nomawi an chawi hnu lawka, "Ka hma hun ka tichiang ang," a tih khan a thusawi hi bawhzui a hlawh lem lo - rei lo teah Real-in a hlawh an pun ang a, contract thar an pe ang tih hi media lamin an 'bai hat' tlat tawh!

Mahse maw...
Ronaldo boruak a reh a, World Cup-a a chet ṭhat leh ṭhat loh chu titi ber a ni tawh zawk. Mahse, Russia aṭangin an haw chiah a, Portuguese forward hian thawm a nei lehnghal.

Mahse, tun hma zawnga Ro­nal­do contract thar chung­chang sawi ni ṭhin kha a chhuah tak tak theih thuin a luah ta zawk. Spanish football writer Andy West chuan, "Ronaldo-a'n Real a chhuahsan theih thu a sawi hi chu thil thleng pangngai ve mai a ni ṭhin.

"Real-in contract tharin an chhang let a, a hlawh an pun a, buaina an chingfel mai zel. Tun ṭumah erawh Real hian vantlang hriatin Ronaldo an chelh tur thu an sawi lo a, Santiago Bernabeu-a chelh zel tumna an nei lo niin a lang," tiin a sawi.

Ronaldo aiah Neymar?
Spanish media ten tun hnaia an tarlan langsar tak chu Real Madrid hian Ronaldo thlak turin Neymar an 'melh' tih hi a ni. Brazilian forward hian season hmasaah pound maktaduai 200-in Paris St-Germain zawm chauh mah se France a chen nuam a ti lo niin an sawi.

Player induh tawk ve tak Ronaldo leh Neymar te dres­sing room pakhata kawl hi thil hautak tak tur niin a lang a, kum tam tawh leh hma hun nei tawh lo zawk Ronaldo hi Real hian chhuahtir an hnial lo niin an sawi - Spanish club hian Neymar man atan pound maktaduai 275 thlengin an phal nia sawi a awm bawk!

Neymar chauh a ni lo - Real hian World Cup-a France tana vul mek Kylian Mbappe lakluh an tum dawn nia sawi a awm bawk a, kum 19 mi forward manah hian Real chuan pound maktaduai 240 pek an inhuam niin an tarlang.

Real leh phatna
Spanish media ten Neymar leh Mbappe nen Real sawi zawm mah se Madrid khaw club chuan player pahnih hi indawrna an neihpui loh thu an sawi ve ve tawh a, Ronal­do chungchangah erawh thuchhuah siam an la nei lo thung!

Real hian inthlak danglam chu an tum ngei niin a lang a, player lakluh an tum chungchanga phatna pawh transfer bazar hun laia club thuchhuah ṭhin ve pangngai mai niin a lang.

Champions League-a vawi thum champion puitu Zine­dine Zidane chuan Real-in mi thar an mamawh nia sawiin a hlawhtlinna hmun hi a lo chhuahsan tawh a, coach thar Julen Lopetegui an nei tawh - Ronaldo hi player tharin an thlak a nih pawhin a mak lo ang.

Buaina chu sum!
Juventus-in season tawpa kum 34 ni tawh mai tur Ronal­do leina turin pawisa nei mah se a hlawh tam lutuk hi buaina tur niin a lang. European football journalist James Horncastle chuan, "Ronaldo hian Juventus-a hlawh hnem ber ni mek Higuain aia a let li a tam a hlawh a, hei hi Juve tan buaina tur a ni ang.

"Juventus hian Ronaldo agent pawh an dawr ngei tawh a, mahse a hlawh avang ringawt pawh hian Ronaldo lakluh hi thil harsa tak tur a ni," a ti. Higuain hian kum khatah pound maktaduai 6.86 a hlawh mek a, Ronaldo kum khat hlawh erawh pound maktaduai 21 vel a ni thung.

Hetihlai hian Spanish chan­chinbu lar Marca chuan Juventus hian Ronaldo hi kum khatah pound maktaduai 26.5 hlawh tir an inhuam niin an tarlang a, an lalut thei a nih chuan kum li chhung atan contract an ziahpui bawk ang.