Champion lai Kidambi Srikanth a tla

Kidambi Srikanth chuan Indonesia Open BWF World Tour Super 1000 tournament nomawi a kawl lai a humhim zo lo. Indian shuttler hian Nilaini zan khan a match hmasa ber khelin Kento Momota lakah 21-12, 14-21, 15-21 in a chak lo nghal.

Kar hmasa lawk khan Malaysian Open-ah player pahnihte hi an intawng tawh a, kar hnih chhung lekin Japanese shuttler lakah world number 1 hlui Srikanth hi vawi hnih a chak lo.

India tlangval chhuan­vawr a chak loh lai hian hmeichhe singles lam­ah PV Sindhu chuan hnehna a chang thung. Rio Olympic silver medalist hian Japan nula Aya Ahori chu minute 36 chhung lekin 21-17, 21-14 in a hneh. Sindhu hma hian HS Prannoy, Saina Nehwal leh Sameer Verma te pawhin an match hmasa berah hnehna an lo chang tawh bawk.