Williams unau chak niah Wozniacki a tla

Wimbledon a nih tawh chuan rilruah Williams unau an rawn lang nghal a, champion tura rinkai pawh an ni phak ṭhin. Serena leh Venus ten second round an paltlang laiin seeded pahnihna Caroline Wozniacki erawh a zinkawng a tawp.

Nilaini zan inkhelah Caroline Wozniacki chu Eka­terina Makarova lakah 6-4, 1-6, 7-5 in a chak lo nghal. Season tira khelh Australian Open champion Wozniacki hi kumin Wimbledon khelh laiah thleng sang tura bei­sei ni mah se player lang­sar thla hmasa ber a ni.

Serena Williams chuan Viktoriya Tomova lakah 6-1, 6-4 in hnehna a chang a, vawi sarih a champion tawhna hmunah hian a inkhelh hnuhnung 16-ah hnehna a chang vek. Centre Court-a inkhelah Serena hian a tir aṭanga a tawp thlengin inkhel a thunun chhuak. Darkar khat leh minute ruk chhunga hnehna chang tur hian winners vawi 24 a vuak chhuah bakah aces vawi li a siam bawk.

Venus Williams pawh­in Alexandra Dulgheru lakah set hmasa ber hloh mah se 4-6, 6-0, 6-1 in a hneh let thei. Venus hi kum 38 mi a ni tawh a, a kum tam deuh tawh mah se thahrui a la ngah hle - thleng sang tur erawh chuan set thum khelh ngai loin awlsam zawka chak dan a hriat a pawimawh ang.