Ball vuak thiam Federer tan a awlsam
Wimbledon champion lai Roger Federer chuan a vawi kua nan title lak leh a tum a, second round paltlang turin harsatna a la nei lo. Nilaini zan khan Federer-a'n Lukas Lacko hnehin third round a inhlangkai, grass court inelna lianah hian a zawnin set 26 zet a la chiah bawk.
Centre Court-a inkhelah Federer hian world number 73 Lacko hmaah 6-4, 6-4, 6-1 in hnehna a chang a, darkar khat leh a chanve an inkhelh chhungin winners vawi 48 ngawt a vuak chhuah bakah, a khingpui hi break point a hmuhtir miah lo! Vawi 16 ngawt aces siamin hnehna chang tur hian harsatna a tawk lo.
Kum 36 mi Federer hian a match lehpekah chuan Ivo Karlovic hnehtu Jan-Lennard Struff nen an inkhel leh ang. Federer hi a champion leh thei a nih chuan Czechoslovakia hranghlui Martina Navratilova record nih rualin Wimbledon singles title vawi kua la theipahnihna an ni ang.
A ṭha tawk
Grand Slam vawi 20 champion tawh Federer hi tun hma aṭang tawha a ṭhat bikna chu a ball vuak na leh service ṭha tak hi a ni. Tun inelna bikah pawh hei hi kan hmu chho leh mek - Lacko lakah a service ṭumin point kua chiah a hloh a, first-service point chu 93% a hmu thei bawk.
A tan Centre Court hi hmun thar a ni lo a, mipui ṭan rawn a nih avangin buaina tur a awm lo. Set hnihnaah break point vawi khat a hmuh chhawr
ṭangkai nghal avangin set lak nan a tawk a, kar hmasa lawka Eastbourn Open final lut thei lakah zahngaihna a lantir lo.
Set hnuhnung ber an khelh laiin, Swiss star hian a zawna point 35 ngawt hmuin 5-1 in a kal fal thei! Winners a vuak chhuah hnem chu thuhran ni se, unforced errors vawi 11 chiah a neih avangin tihsual a nei tlem takzet - match point a hmuh hmasak berah mawi leh na zeta a forehand chu Lacko tan dan theih a ni lo.
Wimbledon match 104 khel tawh Federer chuan, "First round ai khan ka khel ṭha zawk. A service tu nih hi a chângtu nih ai chuan a nuam zawk ngei mai, chu tih rualin hlim taka inkhelh theih hi a pawimawh lai chu a ni. Tihsual hlau taka khelh tur a ni a, mahse hlauthawng chunga inkhelh reng chu a hmuhnawm lo thei bawk," tiin tennis chu inelna ni mah se nuam ti taka khelh tur a nih thu a sawi.
Inkhel dang
Nilaini zan inkhel dangah Milos Raonic chuan John Millman chu 7-6 (7-4), 7-6 (7-4), 7-6 (7-4) in a hneh hram. Canadian tlangval hian match hnih a khelh tawhah set la hloh lo mah se awlsam takin hnehna a chang bik lo; Millman laka chak tur hian vanneihna a mamawh tel.
2016 final-ah khan Raonic hi khawtual tlangval Andy Murray lakah a tlawm a, kuminah hian a vawi hnih nan final luh a beisei mek - a match lekpek atan Dennis Novak a hmachhawn dawn. Novak hian Lucas Pouille chu 6-4, 6-2, 6-7 (8-10), 3-6, 6-2 in a lo hneh ve bawk a ni.
Inkhel dangah Sam Querrey chuan Sergiy Stakhovsky 7-6 (7-4), 6-3, 6-3 in a hneh a, Gael Monfils pawhin Paolo Lorenzi chu 3-6, 6-3, 7-6 (7-5), 7-6 (7-3) in a hneh ve bawk. Marin Cilic, Kevin Anderson leh Stan Wawrinka te inkhel tur erawh ruah sur vangin sawn a ni thung.