Dawhsana lawn ho a rem dawn lo

Formula 1 season chu an hmang ṭan thei a nih pawhin kum dang aiin a danglam dawn hle, a hmuna entu an awm dawn loh bakah lawmman sem leh hnam hla sak laia awm dan thlengin a danglam a ngai dawn.

Season dangah chuan intlansiak a zawh hian dawhsanah (podium) a ti ṭha zual pathum an ding tlar a, lawmman semna leh hlanna neih a nih bakah hnam hla tih rik a ni ṭhin. Kuminah erawh inelna neih zawha hun hman 

ṭhin ang hi a awm dawn lo.

F1 motorsport managing director Ross Brawn chuan, "Dawhsanah lawn a rem dawn lo, tuna kan ruahman dan chuan inelna a zawh hnu khan car chu a indawtin an ding ang a, an car bulah driver-te chu an rawn ding chhuak mai ang.

"Nomawi pawh hlan nghal an ni tawh dawn lo, ruahmanna tam tak kan siam a, a hmunah entu awm lo mah se TV lam aṭanga hmuhnawm tak a nih theih nan leh driver tana a hlutna bo lo thei ang bera kalpui a ni dawn," a ti.

Car intlansiakna sang ber hi tun thlengin season an la ṭan thei lo. July 5 hian Austria ramah a hmuna entu awm loin tlan tum a ni a, a tir lamah hian Europe khawmualpuiah a zawnin inelna pariat neih theih an beisei.

Australian leh Dutch Grand Prix te an ṭhulh fel tawh a, tun hnai khan Japanese, Singapore leh Azerbaijan Grand Prix te an ṭhulh leh bawk. Thuneitu lam chuan a theih hram chuan intlanisak 15 tal buatsaih an la tum.