England tan Kawng zau taka hawnin a awm?

England fan-ten 1966-a an champion-na World Cup-ah champion an beisei a, tun ang renga hun duhawm hi an nei tawh kher lo mai thei bawk–zanin dar 7:30-ah Sweden nen quarterfinal an khel dawn.

Three Lions-in last 16 an lut tih a chian rual khan a hmaa inchhawp thei team zingah world champion awmchhun chu Spain chiah an ni. Zaninah Sweden an hneh a nih pawhin an hmaa ding tur chu Russia emaw Croatia a ni a, 'lehlam' ai chuan a awlsam tih a chiang.

Hetihrual hian England boss Gareth Southgate erawh a ṭawng fimkhur a, English coach hian chesual thei reng an ni tih a hai lo. Southgate chuan, "Sweden hi kan zuam sual fo a, chu tihsual chu kan neih nawn a thiang lo," a ti.

A la tawk lo

England-in group stage-ah Belgium chiah hneh loin Tunisia leh Panama an ngam a, Red Devils lakah erawh starting XI-a hmun chang tam lo player te khelhtir an ni. Round of 16-ah Colombia hneh turin penalty shootout an mamawh bawk.

England 'golden generation' tia hminglem an pek ṭhin 2006 World Cup-a Steven Gerrard, Rio Ferdinand, John Terry, David Beckham, Frank Lampard leh Wayne Rooney te khan World Cup-a an thlen san berah quarterfinal bak an thleng thei lo a, Harry Kane leh a ṭhiante hian semifinal an lut a nih phawt chuan fak rawn an hlawh ang.

Southgate erawhin insiamṭhatna tur tam tak an la neih thu sawiin, "Kan hun tawn apiang hi hlim takin kan lawm tur a ni a, chutihrualin duhthusam erawhin kan la khel lo hle tih hi kan hre tur a ni. Quarterfinal chu kan lut ngei a, mah se kan kalkawngah hian tihsual tam tak kan nei a ni," a ti.

A sang berah...

England fans tam takin an kalkawng an en a, final lut tawh ang maiin tam tak chuan last 16 an luh kha an lawm. Mahse, Southgate erawhin hmachhawp tam tak an la nei tih a sawi a, chawlh hunah a la ngai lo.

Kum 47 mi manager chuan, "Hma kan sawn a, kan duh erawh kan la hmu lo. Ka player te hi hlawhtlinna tem chakin an tui hal vek a, mahse an la inzir mek chauh tih hi an hre vek a ni. Colombia laka hnehna kan chan te kha an tan chuan thil thar a ni a, tawnhriat ropui tak a ni a, kan tum ber chu a sang thei ang ber thlen hi a ni," a ti.

Player a nih laia England tana vawi 57 inlan thei chuan World Cup quarterfinal khel tur an nih avangin eng team pawh hmachhawn dawn se inbuatsaih ṭhat a ṭul thu a sawi. Southgate chuan, "Football-ah hian kum 30 chhung hun ka hmang tawh a, hlim leh lawmna a inchhawk reng ṭhin tih ka hria. Colombia kan hneh khan ka lawm ngei a, mahse ka ngaihtuahna erawh Sweden lakah ka pe lehnghal a ni. World Cup quarterfinal a ni tih hi theihnghilh a thiang lo," tiin a sawi.

Sweden an ṭha

World Cup quarterfinal lut an nih avangin Sweden an ṭha tih a chiang a, an zinkawng ngaihtuah ngat phei chuan an ṭhat zia sawi nawn a ṭul–group stage match hmasa berah South Korea an hneh a, vanduai takin Germany (2-1) ngam lo mah se Mexico (3-0) an sawp zui avangin last 16 an lut chiang hle.

Brazil meuh inhnehtawkpuia tournament duhawm tak hmangtu Switzerland chu quarterfinal lut turin 1-0 in an hneh leh a, inkhel thlirlet pawhin Sweden an chungnung–England fan-ten an lawm khuang an beng hma mah mah a, World Cup niloin anmahni zawk hi duh aia 'haw' hma thei an ni ve tho!

Sweden midfielder Sebastian Larsson chuan, "Hei hi kan rilru chu a ni. Team lian zawk nia ngaih pawh hneh thei turin kan rilru a huaisen tawk a, theihtawp chhuah chhunzawm zel kan tum. Champion tih lamin kan rilru a luah lo a, kan hmabak match zel kan thlir," a ti a, thlir thui lutuk avanga chetsual palh an hlau!

Chhungkua aiah football

Sweden captain Andreas Granqvist chu tlarhnungah ban rinawm a ni a, kum 33 mi defender kaihhruaina hnuaiah Sweden hi tun World Cup-a tlarhnung khawng ber pawl an ni. Match li an khelh tawhah goal hnih chiah an la chhuah.

He boruak karah hian Sweden captain hian chanchin ngaihnawm tak a nei a, chu chu nimin khan a nupuiin fanu a hrin sak thu a ni. Wigan defender hlui hian a nupui bulah hun hman duh mah se a nupui hian a rilru lak pen a duh loh avangin Russi-a a awm turin a ti!

Andreas Granqvist chuan, "Haw turin min duh lo a, he hmuna awma inkhel turin min ti a ni," a ti! He team hian an rilru, taksa, thlarau leh rinna zawng zawng nen an khel dawn tih a chiang a, chu aia hmachhawn chakawm lo chu a awm chuang lo.