MiMSA rider pakua inlan dawn

JK Tyre FMSCI National Racing Championship vawi 21-na chu July 6-8, 2018 hian Kari Motor Speedway, Coimbatore-ah neih a ni leh dawn. Mizoram Motorsports Association (MiMSA) chuan Suzuki Gixxer Cup leh Rookie Cup hmachhawn turin rider 10 a tir chhuak a, qualifying paltlang pakua an inlan thei dawn.

Mizo rider-te hian kar hmasa khan inelna neihna tur hmun hi an thleng tawh a, nitin practice session an tlan ṭhin. Inelna tak hi Inrinni leh Pathianni chhunah neih tur a ni ang. JK Tyre FMSCI National Racing Championship hi hlawm thuma neih tur a ni dawn a, August 31–September 2 chhung hian Coimbatore-ah tho second round neih tur niin, November 16-18 hian Buddh International Circuit, Delhi-ah a hmawr bawkna neih a ni ang.

JK Tyre Suzuki Gixxer Cup tlan tur hian qualifying paltlang hmasak a ngai a, nikuma inlan tawh Malsawmdawngliana bakah Anthony Lalawmpuia te an tlan ang. Inelna hmachhawn tur hian rider 120-in qualifier an tlan a, heng zinga pakua chiah thlan thar an ni. Gixxer Cup-ah hian inlan turin kum bithliah a awm lo a, lawmman atan bike leh pawisa a ni.

Kum 16 chin tlanna tura siam RedBull Rookie Cup-ah Mizo rider pasarih an inlan dawn a, he inelna huanga champion chuan India aiawhin Spain-ah Red Bull Rookie Cup-ah an inlan dawn a ni. Nikum khan Israel Vanlalhruaizela chuan hlawhtlinna a lo chang tawh, mahse visa fel lo vangin a kal chhunzawm thei ta lo a ni.

RedBull Rookie Cup hi ramchhunga tawp mai a ni lo a, bike inelna sang ber MotoGP rider–Jack Miller, Dani Pedrosa leh Johann Zarco te pawhin hming an lo chher tawhna a nih avangin theihna nei sang leh tihtakzeta ti tan chuan kawng a awm.

MiMSA president Vanlalmuana chuan, "Pathianin Mizote hi theihna sang tak min pe a, bike intlansiak huangah pawh hun rei lote chhungin hma kan sawn ve ta hle. A hmun ṭha kan nei lo chung pawhin state pawnah kan naute an zahpuiawm bik lo a, track mumal kan neih hunah phei chuan tun aiin hma kan sawn ngei ang," tiin Vanglaini a hrilh.