A thlengtu hneh lo ṭhin Croatia
Croatia-in zanin dar 11:30 hian Fisht Stadium-ah inelna thlengtu Russia chu FIFA World Cup quarterfinal-ah an hmachhawn dawn.
Valtreni hian World Cup vawi li an khelh tawhah ṭum hnih a thlengtu a hmachhawn tawh a, an chak lo ve ve. An khingpui tur Russia hian 2010 champion Spain bakah Mohamed Salah telna Egypt te an pet thla tawh a, an sulhnu thlirin eng team pawh chak thei an ni.
Fimkhur a ṭul
Croatia hian kum 1998 khan inelna thlengtu France chu semifinal-ah an hmachhawn a, goal khata hma an hruai hnuah Les Bleus-in 2-1 in an lehthal. World Cup hnuhnung berah a thlengtu Brazil chu match hmasa berah hmachhawnin 3-1 in an hneh lo bawk.
Tun ṭuma an hmachhawn tur Russia hi FIFA ranking-ah chuan 70-na chauh an ni a, amaherawhchu World Cup-ah chuan inelna thlengtu hi an tawh a khirh ṭhin. Kum 2010-a South Africa-in first round an kal pel thei lo tih loh chu inelna thlengtu first round-a tla an awm lo.
World Cup vawi 20 khelh tawhah inelna thlengtu vawi ruk an champion tawh a, khawvel barakhaihtu erawh South Korea an ni. Taegeuk Warriors hian kum 2002 khan semifinal hial an thleng a, mipui puihna nen Italy leh Spain te an pet thla a, Germany meuh pawh goal khat chauhin an hneh lo.
Russia hi inelna ṭan hmain team zuamawm an ni a, June 2016 khan coach Leonid Slutsky banin Stanislav Cherchesov an lalut a, result ṭhain a zui mai lo. 2017 FIFA Confederations Cup-ah inelna thlengtu nichungin group stage-ah an tla nghal a, hemi hnu hian friendly match vawi riat khelin vawi khat chiah an chak a, vawi li chak loin WC hmaa match hnuhnung pasarihah chak hmel an hmu lo bawk.
Amaherawhchu World Cup-ah meuh chuan ṭawiawmtu an ṭha a, player 12-na nen an beisei ngam loh second round an thlen hnuah pawh 2010 champion Spain meuh an hneh thei a. Knockout a nih tawh avangin goal venhim an thiamna hi an ṭhatna lai a ni a, goal khung thei player Artem Dzyuba leh Denis Cheryshev te an kawl bawk avangin Croatia tan fimkhur a ṭul ang.
En châkawm chu
Croatia midfield-ah hian Real Madrid leh Barcelona playmaker Luka Modric leh Ivan Rakitic te an awm a, group stage-a Argentina an hneh ṭum pawhin an hmuhnawm hle. Amaherawhchu Denmark an khelh ṭumin an hmuhnawm tawk lo a, chutihrualin an huaisenna erawh a lang tho a, captain Modric chuan hun pangngaia penalty a hlah hnuah penalty shootout-ah a duh thlanna ang ngeia pet nawn leh sakin a pet goal tawh.
Valtreni hian goal nawr turin Mandzukic, Ivan Perisic leh Ante Rebic te an kawl a, Real Madrid midfielder Mateo Kovacic bench-a dah thei an ni a, player nei ṭha zawk an nih avangin zanin hian ball keng tam leh a nawrtu zawk an ni ang.
Russsia-in tlarhnung an rem phui ṭha a, an theihna tak an hriat chian avangin ball an chan loh lai chuan team pumpui hi defender anga chhal theih an ni. Chutihrualin midfielder nung ṭha Aleksandr Golovin an nei a, an star player Alan Dzagoev chu match hmasa bera a inhliam hnuin a dam leh tawh a, counter attack hmanga nawr let chu an thupui ber a nih a rinawm.
Bang rinawm
Russia goalkeeper Igor Akinfeev chu Spain an hnehna kawngah hero a ni a, Koke leh Iago Aspas te penalty pet chu a dan sak. La Roja nen Russia hian penalty thlen an cho a, Stanislav Cherchesov pawhin hemi mil hial substitution pawh a siam. Croatia nen pawh Akinfeev leh mipui ṭantu an neih avangin penalty pet nawn an hreh lo ang.
Croatia-in penalty pumpelh an duh ang a, an thleng ta a nih pawhin an zam lo ang. Valtreni hian quarterfinal thleng tur hian Denmark chu penalty shootout-ah an hneh a, Croatian keeper Danijel Subasic chuan vawi thum a dang.