Nadal leh Djokovic an tlang

All England Club-ah khawvel tennis khel thiam rual ten Wimbledon an khel kal mek zel a, Ningani zan khan world number 1 Rafael Nadal leh Novak Djokovic te chuan harsatna lian lutuk tawk loin third round an lut.

Centre Court-a inkhelah vawi hnih champion tawh Nadal chuan 6-4, 6-3, 6-4 in Mikhail Kukushkin a hneh a, a match lehpekah Alex de Minaur a hmachhawn leh ang. Djokovic pawhin third round-a Kyle Edmund hmachhawn thei turin Horacio Zeballos chu 6-1, 6-2, 6-3 in a hneh ve bawk.

Nadal a tlang

Grand Slam vawi 17 ngawt champion tawh Nadal leh major title la nei lo Kukushkin te inkhel kha an point score zat chauh en chuan court chhunga an inbeih tawk zia an hre phak lo ang - awlsam tak angin lang mah se Nadal-a'n fiahna a paltlang.

Kar hmasa lawka East­bourne quarterfinal khel thei Ku­kush­kin-a'n a forehand na tak hmangin Nadal a chhaih buai ve hle a, vawi 28 ngawt winners vaw chhuakin world number 1 ai hian vawi kuain a ngah zawk!

Mahse, kum 30 mi Kukush­kin hian tihsual a ngah, vawi 34 ngawt unforced errors a neih chu a chak loh chhan langsar a ni. Spanish tlangval Nadal-a'n hun pawimawh lai takin a tawnhriat a hmang ṭangkai zauh zel a, a service vawi hnih hloh ve mah se vawi nga a chhuhsak let theih avangin a tlang.

Kukushkin hian hnehna chang zo lo mah se a chanchinin sawi zui a hlawh, a coach chu a nupui Anastasia Kukushkina niin, a che vel a hmuhnawm a, mipui lawm a hlawh hle. A duhthusam ram thleng zo lo mah se, second round a thlen avang hian Rs 57,35,754 a hlawh phak tho.

Harsatna karah

Novak Djokovic tan world number 126 Zeballos hneh turin harsatna lian a awm lo a, chutihrualin Serbian tlangval hian ngaihṭha takin court a chuahsan lo. Set thumna a game sarihna an khelh laiin a malpui vei lam na vangin a chawl deuh reng a ni.

World number 1 hlui Djo­kovic hi a kiu hliam vangin season hmasa chawhnu lam aṭang khan a buai tawh a, ranking lamah pawh hma sawn leh deuh tawh nachungin 21-na bak a la ni phak lo.

Tun hnaiah khel ṭha tawk lo mah se Djokovic hi a vawi khat nana Wimbledon second round khel ve chauh Zeballos tan chuan a la thiam lua - Grand Slam vawi 12 champion tawh hian Argentine tlangval lakah aces vawi 15 a vuak chhuah bak­ah winners vawi 31 a hlap bawk.

Kum 31 mi Djokovic hian Wimbledon bikah match 60 hnehna a chang tling ta chiah a, hranghlui John McEnroe chu match khatin a khum chiah - kuminah hian a vawi li nan champion leh a tum mek a ni.

Barakhaih

Player langsar pahnih ten hlawhtlinna an chan lai hian Marin Cilic erawh Guido Pella hneh loin a tla. Cilic hian season hmasa khan final a thleng a, kuminah pawh seeded pathumna a ni phak. Mahse, world number 82 lakah 3-6, 1-6, 6-4, 7-6 (7-4), 7-5 in a chak lo.

US Open champion tawh Croatian tlangval Cilic tan chak loh hi mual­phona a tling a, hnehna changtu Pella tan erawh chanchin ṭha bik a ni - tennis a khelh hun chhunga a vawi khat nan Grand Slam third round a inhlangkai ve chiah a ni a, world number 103 Mackenzie Mcdonald nen an inhmachhawn leh ang.

Inkhel dangah Grand Slam vawi thum champion tawh Stan Wawrinka chu 7-6 (9-7), 6-3, 7-6 (8-6) in Italian tlangval Thomas Fabbiano lakah a chak lo. Wawrinka hi tun hnaiah a khup hliam dam tawhin beisei ang result a la nei thei lo a, world ranking-ah pawh 224-na a ni mek.

Seeded pakuana John Isner chuan aces vawi 64 ngawt siamin Ruben Bemelmans chu 6-1, 6-4, 6-7 (6), 6-7 (3), 7-5 in a hneh ve bawk. Wimbledon-ah hian 2010 khan Isner (113 aces) leh Nicolas Mahut (110 aces) ten an intawn ṭumin record an lo siam tawh a, tun ṭuma mi hi match khat chhunga aces siam hnem pathumna a ni.

Seeded pariatna ni Kevin Anderson chuan Andreas Seppi lakah 6-3, 6-7, 6-3, 6-4 in hnehna a chang a, Nick Kyrgios chu Robin Haase lakah 6-3, 6-4, 7-5 in a chak ve bawk.