East Bengal leh Quess thawk dun dawn
I League club East Bengal chuan business service provider Quess Corp nena an thawhdunna thu an puang a, Quess East Bengal FC Pvt Ltd (QEBFC) tiin Kolkata club hi hriat an ni tawh ang.
East Bengal leh Quess hian board of directors-ah member pali ve ve an nei dawn a, sum thawhtu tur Quess hian share 70% neiin East Bengal hian 30% share an nei dawn thung.
Quess hian kum 10 chhung atan East Bengal-ah hian vaibelchhe 400 an inseng dawn a, kum tinin Kolkata club hian budget-ah vaibelchhe 40 an nei ziah dawn tihna a ni.
EB managing director Kalyan Majumder chuan, "UB nena kan inremna duh anga a kal tak lohah chuan Quess hi indawrna kan neihpui a, vawiina a hlawhtlinna kan hmu thei hi ka lawm hle. India rama football club ṭha ber din theih kan inbeisei a ni," a ti.
Quess managing director Ajit Isaac chuan, "Kan tum hmasak tur chu Indian Super League khelh a ni dawn a, hemi piah lamah hian player te awmna, training na hmun leh hma ṭhate chu kan buaipui tur a ni," tiin a sawi ve bawk.
Hetihlai hian East Bengal executive committee member Debabrata Sarkar chuan, "Quest hian a ṭul chuan kum khata vaibelchhe 100 insen pawh an hreh lo a, sum chu kan buaina tur a ni lo," a ti a, ISL atana bid hawn a nih chuan dilna an thehluh tur thu a sawi.