Ramhlun North-in goal surtir

Lalbiakliana Memorial MFA Super Cup chu nimin khan khelh chhunzawm a ni a, first round khelh zawh a ni ta. MPL club Ramhlun North FC chuan Lammualah Lungdai Hmar Veng FC chu 14-0 in an sawp a, Tanhril hnehtu I League club Aizawl FC nen last 16 an lut.

MPL kaithar Chawnpui FC chuan fiahna hmasa ber an paltlang thei lo a, Aizawl FC nen hun pangngaia 2-2 a an inhnehtawk hnuin penalty shootout-ah an chak lo. Chawnpui FC hi first round aṭanga an khelh avangin team 32 zingah an inhlangkai thei lo.

RG Stadium-ah first round match thum khelh a ni a, Ramthar Vengin penalty shootout-ah Zemabawk North hneh hramin Zemabawk club Abb FC erawh J&S Memorial FC lakah an tlawm thung.

Vawiiin hian Lammualah inkhel a awm dawn a, RG Stadium-ah second round khelh chhunzawm tur a ni. Champion rinkai zinga mi MPL club Mizoram Police chuan chhun dar 12:30-ah Vairengte FC an hmachhawn dawn.