Man United-in Chelsea an pawt ding

Stamford Bridge-ah Premier League hmahruaitu Chelsea leh manager nghet nei lo Manchester United te 1-1 an inhnehtawk a, Thomas Tuchel-a hote hi a suttu zawk an ni.

Pathianni zan inkhelah Man United tan Jadon Sancho-a'n minute 50-naah goal hmahruai a khung a, Blues-in Jorginho penalty hmangin minute 69-naah an sut. Blues-in point 30 hmuin hma hruai chhunzawm mah se champion lai Manchester City nen an inkarah point khat chauh a awm tawh.

Chelsea hian December 1, Nilaini zan 1:00 hian Watford hmachhawn turin Vicarage Road an tlawh dawn a, Manchester United-in December 2, Ningani zanah Arsenal an mikhual ve bawk ang.

Bench-ah Ronaldo
Michael Carrick-a'n thutlukna huaisen a siam a, 4-3-1-2 formation hmangin Cristiano Ronaldo tan hmun a awm lo. Team che ṭha tluang Blues an khelh dawn avangin tlarhnung an rem chhah hle.

Captain Harry Maguire leh Raphael Varane te chhawr theih an nih loh avangin Eric Bailly leh Victor Lindelof te an inkawp a, mual sirah Alex Telles leh Aaron Wan-Bissaka te an awm. Defence thlawp turin defensive midfielder pathum ngawt an lut.

Fred leh Scott McTominay te bakah Nemanja Matic ten bul an ṭan a, tlarhmaah Sancho leh Marcus Rashford te inkawpin Bruno Fernandes-a'n a thlawp bawk.

Chelsea-in Juventus sawptute aṭangin player pathum a thlak. Ben Chilwell leh N'Golo Kante te chu inhliam vanga an luh theih loh avangin Marcos Alonso leh Ruben Loftus-Cheek ten an ai an awh. Timo Werner a dam tawh a, German forward hi Christian Pulisic aiah a lut.

Blues an hmuhnawm
Inkhel an ṭan a, team ṭha zawk leh khel ṭha tluang zawk Chelsea an hmuhnawm nghal. Hakim Ziyech-a'n chance ṭha hmasa chu David de Gea zawnah a pet a, Callum Hudson-Odoi pawhin keeper chauh a hmachhawn hnuah a pet goal lo.

Chelsea-in chance ṭha ṭum hnih an neih hian minute thum chauh a la ral a, amaherawhchu Blues tlarhma aiin Man United tlarhnung an insiamrem chak zawk. Goal venhim tum Man United-in an khingpuite pressure pe fuh tawk lo mah se Blues-in a hmawr an thleng bik lo.

Darkar chanve hnuah Antonio Rudiger-a ball petin De Gea kut a fuh thawi hnuah crossbar a per a, Chelsea-in inkhel thunun mah se goal khung theihna tur chance ṭha bik insiam an harsat. Man United-in hun chanve hmalamah half chance vawi khat an nei a, Fred-a ball vawrh chu Sancho-a'n a lak thlak fuh loh avangin engmah loah a chhuak.

A goal ta
Second half-ah pawh Chelsea bawk chu a nawrtu ni mah se minute 50-naah Fernandes-a ball clear chu Jorginho-a'n lak thlak tum mah se Jadon Sancho tana lak nuam chiahin a ti per a, English winger hian chak taka lalutin Marcus Rashford-a'n a thlawp bawk. Villarreal laka goal khungtu Sancho hian keeper Mendy hmaah inrintawkna lantirin goal hmahruai a khung.

Goal luh hnuah inkhelh kalhmang a dang hret a, Man United an phur thar. Cristiano Ronaldo-a'n goal khungtu Sancho a rawn thlak. Man United tlarhnung a phui ṭha viaua a lan laiin Aaron Wan-Bissaka ball clear turin Thiago Silva a pet a, Brazilian defender fin tuarin penalty a chawi. Jorginho-a'n a tihsual siam ṭhat nan minute 69-naah penalty a khung.

Chelsea-in goal dang khung belh leh turin hun an la ngah a, Werner-a'n a hun ṭha neih chu goal zawnah a pet thei lo. Man United pawhin chance ṭha bik an nei a, minute 87-naah keeper Mendy-a'n box pawna awm Fred a pass. Brazilian midfielder hian Ronaldo leh Jesse Lingard te pass tur a nei chungin keeper chip khum a tum a, Chelsea keeper-in a man chat.

Hun tawp thlengin inkhel a hmuhnawm a, injury time-ah Ziyech leh Christian Pulisic ten mual ding lamah passing mawi an lantir. Pulisic-a ball cross ṭha zet chu vengtu nei Rudiger-a'n six yard box hma chiah aṭangin a pet over luah.

Che ṭha tluang lai Chelsea leh team talbuai Man United te 1-1 in an inhnehtawk a, chutihrualin Blues-in goal 24 attempt an nei a, United-in vawi thum chauh an nei thung.

Kan khelh danah ka lawm. A tir aṭangin inkhel kan thunun a, chak duhin chawl loin kan nawr. Vanduaithlak takin goal hnihah kan inrawlh. Hun tawp dawna Rudiger-a chance kha chu a ṭha ngei a, chak theihna tur a ni. Chutichung chuan kan result-a kan lawm a ṭul. Kan game discipline a ṭha em em a, result hi chu engpawh a thleng thei. Chutihrualin tun anga ṭhaa kan khelh chuan chakna chance a sang. Lukaku a la dam chiang lo a, a dam ṭhat chuan bul ṭan tur a ni. - Thomas Tuchel, Chelsea manager

Dik taka sawi chuan goal kan khung hmasa a, chak theihna hun ṭha kan bawhpelh avangin pawi ka ti. Team rem dan leh khelh dan chungchangah Ralf Rangnick a inrawlh lo. - Michael Carrick, Man United caretaker