Tlai dar 2:00-ah Mizoram vs Nagaland

Santosh Trophy qualifying round-ah vawiin tlai dar 2:00 hian Mizoramin Nagaland an hmachhawn dawn. Group B inkhel dangah inelna thlengtu Manipur-in chawhma dar 9:30 hian Tripura an inkhel ve bawk ang. Group khat aṭangin team khat chiahin final round an lut dawn a, goal difference neih ṭhat a pawimawh dawn.

An dam kim
Mizoramin Tripura an hmachhawn ṭumin inhliam vangin Lalrinzuala a inlan thei lo a, Bengaluru FC reserve team-ah pawh awm tawh Serchhip tlangval Rinzuala hi chhawr theih a ni dawn. Tripura an hneh ṭumin tlarhmaa mal tlat Farkawn tlangval Lalhriatpuia'n goal awmchhun a khung a, coach Samson Ramengmawia thutlukna siam dan tur hriat a châkawm hle.

Hriat tel tura pawimawh chu Santosh Trophy-ah hian January 1, 2022 (Under 21 player) pathum chhawr reng a ṭul a, hemi hre tel chung hian thutlukna siam a ngai. Match hmasa berah Under 21 player-a ziahluh panga aṭangin F. Malsawmzuala, Lalremruata leh Eric Remruatpuia Chhangte ten bul an ṭan a, bench aṭanga lut Lalbiakhlua a che ṭha viau bawk.

Coach Samson-a'n player a siksawi hret a nih pawhin goalkeeper F. Lalmuanawma bakah a hmaa ding captain Lalrinchhana Tochhawng leh Lalmuanawma (Munez-a) te chu khawih chet loh turah a ngai theih. Goal mamawh tam avangin tlarhmaah 4-4-2 an hmang thei a, chutihrualin an hman thiam sa 4-5-1 an hmang thei bawk. Thil chiang erawh Tripura laka goal khat chauh an khung avangin player pahnih khat chu an siksawi ang.

Nagaland hi...
Manipur-in 3-0 a an sawp Nagaland hi Mizoram tan chuan hneh ngei turah a ngaih theih. Amaherawhchu Nagaland hi team chhia an ni lo a, an match hmasa bera an chak loh chhanah hian Covid-19 inkhuahkhirhna an tuarah a ngaih theih.

Nagaland team hian RT-PCR test result an nghah avangin Manipur an hmachhawn hma hian training-na hun an nei lo a, an chak loh danah chhuanlam tur an nei. Tlarhmaah Delhi FC forward Laiwang Bohham an kawl a, Manipur nen pawh an goal nawrna ber a ni.

Kum 21 mi Laiwang hi Nagaland innghahna tur a ni dawn a, Mizoram tlarhnung tan ngaihthah chi a ni lo ang. Chutihrualin Mizoram-in match tawp bera point khat chauh mamawh turin goal thum aia tam an khung a ṭul dawn a, Nagaland lakah hian kawng engkima an chungnung a ṭul ang.

Engtin zel?
Mizoram manager K. Lalenghluna (Maenga) chuan, "Kan dam kim a, player zawng zawng chhawr theih vek an nih avangin kan lawm. Goal khung tam kan mamawh tih kan hria a, chutihrualin kan tum hmasak ber tur chu chak a ni. Point thum hmu turin theihtawp kan chhuah ang a, kan game anga kan khelh chhuah chuan goal chu a rawn awm mai turah kan ngai," tiin Vanglaini a hrilh.

Nagaland leh Mizoram hi qualifying round-ah hian group khatah an awm ngai meuh lo a, an awm ho hnuhnun ber chu Mizoram champion ṭum daih tawh kha a ni. Kum 2014 khan Lammualah inhmachhawnin Mizoramin Zico Zoremsanga, F. Lalrinpuia leh Lalfakzuala te hmangin 3-0 in an hneh.