Tottenham inkhelh hun an sawn

Pathianni zan dar 7:30 khan Tottenham Hotspur chu Burnley nen Premier League match khel tura tih ni mah se, an inkhelhna tur hmun Burnley khelmualah vur tla a tam hret a, inkhelh hun tur hi sawn a ni.

Turf Moor-a inkhel tur hi ṭan nan minute 50 a la awm tihin sawn a ni a, he thu buatsaih a nih lai hian he match khelh hun tur hi tihchian a la ni rih lo.

Spurs hian December-ah match kua ngawt khelh tur an neih avangin nakkum lamah team pahnih hi an inhmachhawn mai a rinawm - kum tira an inkhelh theih dawn leh dawn loh pawh FA Cup, Carabao Cup leh Europa Conference League-a Spurs thlen chinin a hril viau ang.

Referee Peter Bankes chuan, "Inkhelh a nih theih ngeina turin theihtawp an chhuah a, mahse, minute 10 lek chhungin vurin khelmual a bawh khat lehzel a ni, " tiin inkhelh chi a nih loh thu a sawi.

Burnley manager Sean Dyche chuan, "Tun dinhmunah chuan inkhelhna chi a ni ngang lo a ni," tiin thutlukna chu loh theih loha siam a nih thu a sawi ve bawk.

Tottenham boss Antonio Conte chuan, "Inkhel turin kan inpeih vek tawh a, inkhelh theih loh chu a hrehawm duh hle. Chutihrual chuan Premier League hian player leh fan-te himna tur ngaihtuah chungin thutlukna dik an siamah ka ngai.

"Hetiang ang boruak hnuaia kan inkhelh chuan football a ni dawn lo. Nuam ti taka inkhelh ka duh a, hetiang dinhmunah erawh chutiang chu tih theih a ni lo a, player tan risk a sang em em bawk, " a ti a, English top flight league thuneitute thutlukna a hrethiam hle.