Champion lai Manchester City an chak
Etihad Stadium-ah vur tlak hnem vangin inkhel tihtawp lailawk hial ngai mah se Manchester City chakna tur a dang zo lo a, mikhual West Ham lakah 2-1 in an chak.
Manchester City tan hian Ilkay Gundogan leh Fernandinho ten goal khat ve ve an khung a, hun pek belha Hammers tana Manuel Lanzini goal khungin awmzia a nei phak lo.
City-in hnehna an chan avangin hmahruaitu Chelsea an phak lohna chu point khat chiah a ni ta a, an hnuai chiahah point khata hniamin Liverpool an awm bawk - Premier League a ngaihnawm zel.
Davie Moyes enkawl Hammers pawh league match hnih a zawna an tlawm chungin top four-ah an la awm fan a, pangana Arsenal nen point 23 ve ve an hmuh avangin a thiam pali zinga an dinhmun erawh a nghet lo hle.
Hei le City
Pep Guardiola-a'n Premier League-a Hammers a hmachhawnah vawi khat chiah chak loh a la nei a, Pathianni zanah pawh thawnthu a danglam lo - vawi 11 a hmachhawnah vawi 10 a chak ta!
City tan Riyad Mahrez chuan goal hmahruai a khungah inngai mah se offside vangin pawmsak a ni lo a, Algerian forward hian goal thawk chhuak turin a nghah rei erawh a ngai lo.
Minute 33-naa a shot chu Hammers defender-ten an lo dang per a, a per lehlam hi Gundogan chuan hnai set sawt aṭangin a lo pet lut - tun season-a goal thum a khungna chiah a ni.
Etihad Stadium-ah vur a tla nasa a, City pawhin an duh angin goal an khung thei bik lo - mahse, minute 90-naah goal khung khat ve tak Fernandinho chuan October 2018 hnua Premier League-a a goal hmasa ber a khung a, chak tur a chiang.
A chei mawina
Minute 90-naa Fernandinho goal khung danah City player-te ball inpek kual danin fak a phu a, chutihrual chiah chuan Hammers tlarhnungten an tih tur an ti tawk lo bawk.
Hammers inchhirna tizual turin Manuel Lanzini chuan hun pek belh minute linaah goal mawi a rawn khung ve leh a, mahse, goal khat dang an lo chhuah hman avangin scoreline chei mawina chauh a ni tawh.
David Moyes-a'n City goal nawr na dang turin forward Jarrod Bowen aiah wing back Arthur Masuaku a luhtir a, mahse, City goal nawr na a danglam phah lo.
Ben Johnson chuan goalline aṭangin Mahrez-a goal khung tur a pet chhuak a, Mahrez hian post a pet per bawk - Aaron Cresswell-a'n Gabriel Jesus chance neih tur a lo tihbuai hmante chu a ṭha hle.
Pep a lawm
City boss Pep Guardiola chuan, "Kan inkhelhna boruak, a bik takin first half-a kan chance siam zozai te thlirin kan tan chuan result ṭha tak a ni a, ka player-te tumna leh khelh dan ka fak a ni.
"Goal kan chhuah tam lo a, set-piece kan veng ṭha a, counter-attack tur pawh kan dang hneh hle. Khaw awm dan avangin duh ang thalin kan khel thei lo zawk a, kan khel ṭha hle a ni," a ti.
Vur tlak nasat luat avangin second half chu minute sawm dawna tih khawtlai a ngai a, Pep chuan khelmual enkawltu head groundsman Lee Jackson leh a naute a fak bawk.
Guardiola chuan, "Khelmual enkawltute kha kan tan chuan man of the match an ni a, an hna ṭha taka an thawh avangin kan inkhelh theih phah a ni," tiin a sawi.