Vawiin aṭangin State Boxing C'ship

Mizoram State Boxing Championship chu vawiin aṭangin Serchhip-ah neih ṭan a ni dawn a, December 3, Zirtawpni thleng neih a ni ang. Mizoram boxing-a thuneitu sang ber Mizoram Boxing Association (MIZBA) chuan inelnaah hian professional boxer-ten dilna an thehluh chuan tel an remti.

LPS Fight Night 2-a inlan NT Lalbiakkima leh Laldingliana ten an tel loh tur thu an tichiang tawh a, Sete Boxing Academy aṭangin Vanlalawmpuia, F Zoramchhana, HC Lalramfela leh H. Lalrinhlua te an tel dawn lo. Mualpui tlangval C. Lalhruaitluanga erawh tel thei dinhmunah a ding thung.

Chutihrualin State Boxing C'ship-ah hian Mizoram hmun hrang hrangin boxer ṭha an fuan khawm dawn a, talent chhuak thar hmuh tur a awm turah a ngaih theih. Aizawl District aiawh tur boxer 22 te pawhin nimin khan Serchhip an pan.

Boxing C'ship-ah hian senior (elite), junior (youth) leh sub junior category a awm dawn a, mipa leh hmeichhe hmangin category tin hi thliar a ni vek ang.

Thlirna Tawi
*Kum bithliah dan
Senior (Elite) 19 - 40
Junior (Youth) 16-18
Sub Junior 12 - 15

*Senior leh Junior: Round thum a awm ang a, round khat hi minute thum zel niin round inkarah minute khat zel chawlh a ni ang.

*Sub Junior: Round thum a awm ang a, round khat hi minute hnih zel niin round inkarah minute khat zel chawlh a ni ang.