Bengaluru leh Blasters inhnehtawk

Pathianni zan Indian Super League inkhelah Bengaluru leh Kerala Blasters an intawng a, team pahnih hi 1-1 a inhnehtawkin a chak zawk an awm lo.

Team pahnihin goal an khung lo reng a, goal awm loin an ṭin mai dawn niin a lang hman - mahse, Bengaluru wing back Ashique Kuruniyan chuan minute 84 hnuah goal hnih a rawn khung!

India international hian minute 84-naah a team tan a khung phawt a, Blasters si ban nghaktu, Aizawl FC goalkeeper hlui Albino Gomes-a'n a hnathawh tur a thawk tawk lo tiin a sawi theih.

Mahse, Bengaluru leh Ashique te hlim chhung a rei lo. Kerala club tana bul ṭantu, Mizo tlangval Lalṭhathanga Khawlhring (Puitea) chuan Nishu Kumar tan ball a pe a, kum 24 mi defender hian Marko Leskovic a pe zui.

Croatian club ṭha Dinamo Zagreb aṭanga Blasters pantu centre back Leskovic hian ball a thlawh lut zui a, ball kal lo petchhuah tumtu Ashique chuan an lamah a ti lut daih - hun tawp thlengin goal dang a lut lo a, 'hero' ni mai tur kha 'zero' a ni zui.

Bengaluru-in ISL-a an match hmasa berah 4-2 in NorthEast United ngam mah se Highlander laka an chak hnuin chak an nei leh tawh lo - Odisha lakah 3-1 in an tlawm zui a, Blasters an inhnehtawkpui leh ta.

Blasters thawnthu a danglam tam lo - an match hmasa berah ATK Mohun Bagan chu 4-2 in an ngam lo a, NorthEast leh Bengaluru a zawnin an inhnehtawkpui leh ta bawk.

Zanin dar 7:30-ah inkhel pakhat a awm leh dawn a, Mizo pariat awmna Odisha FC chuan Lalrinliana Hnamte khelhna East Bengal an hmachhawn ang.

November 28, Pathianni Zan
Bengaluru FC 1-1 Kerala Blasters
BEN: Ashique Kuruniyan 84'
KEB: Ashique Kuruniyan 88' (OG)

Zanin Inkhel Tur
Odisha FC 7:30 PM East Bengal