Chak mah se PSG lawm a kim lo

Lionel Messi-a'n assist hmangin 'hattrick' a siam a, defender Sergio Ramos chuan Paris St-Germain tana a match hmasa ber a khel bawk. Paris club hian khualmualah Saint-Etienne 3-1 a an hneh theih avangin lawm tur an ni.

Mahse, an lawm erawh a kim thei bik lo. Hun tawp dawnah Neymar chu hliam vanga zawn chhuah a ngai a, a hliam nat dan hi chiang taka sawi theih la ni lo mah se thlalak aṭanga a lan dan chuan a kerek a nat hmel hle.

PSG chak hram
Pathianni zan Geoffroy-Guichard hmuna Ligue 1 inkhelah PSG lam hi awlsam takin an chak bik lo. A tir lamah Messi siamsak Neymar-a'n a khung chu offside vanga pawm a ni lo. Denis Bouanga hmangin St Etienne lamin goal an khung hmasa ta zawk.

Minute 45-naah St Etienne defender Timothee Kolodziejczak-a'n Kylian Mbappe laka a foul avangin red card a hmu a, chawlhlawk hma chiahin Marquinhos chuan si phurh a sut, a siamsaktu chu Messi a ni.

Team nem zawk St Etienne lamin minute 45 chhung player kim loa an khelh a ngai, goal engzat nge an chhuah belh ang tih chu zawhna a ni. Mahse, hun rei tak chhung chu an inveng thei tlat, point an hmu dawn ni pawhin a lang hman hial.

Hun tawp dawnah Messi leh a ṭhiante dan reng theih an ni lo. Argentina captain hian Angel di Maria leh Marquinhos te goal tur siamsak lehin harsa angreng takin point thum an hmu. Ligue 1 table-ah point 12 zetin hma an hruai fal zel.

Lawm a kim lo
PSG lamin 2-1 a hma an hruai laiin Neymar a inhliam. Defender Yvann Macon nen ball an inchuhna lamah Neymar hi a tlu a, a ke lei vam chu rap lekin, a kerek a thlep chiang hle, ruh tliak erawh niin a lang lo - khelmual aṭanga zawn chhuah a ni.

Kum 29 mi Neymar chuan, "Hliam hi chu infiamnain a ken tel a ni miau mai si a, lungngaia indawm kun mai loin hma lam kan thlir tur a ni ang. Tun hma aia ṭha zawkin ka lo kir leh ngai ang," tiin instagram lamah a tarlang.

Brazlian forward hian PSG a zawm hnuah hliam a nei fo a, match pawh a khel tam tawk lo. Champions League nomawi chawi duh PSG tan chuan Neymar inhliam hi a pawi thei, chutih rualin Messi, Mbappe leh Di Maria te an la nei.

PSG manager Poch chuan, "A kerek na a ni khawp mai, endik a nih hnuah a nihna tak a hriat theih chauh ang," a ti a, a player dinhmun tak hi a la hrechiang bik lo, hliam nasa lo zawk ni se tih chu a duhthusam a ni ang.