Real chhantu Vinicius; Atletico chak chiang

La Liga hmahruaitu Real Madrid an tawlhthlu mai dawn nia a lan hnuah season hmang ṭha em em mai Vinicius Junior a inlar a, minute 87-naa a goal khung hmangin Real Madrid chu Sevilla lakah 2-1 in hnehna a chanpui.

Mikhual tlangnel Sevilla-in minute 12-na lekah Rafa Mir hmangin goal hmahruai an khung a, mahse, Karim Benzema chuan Real ṭantute mangang lutuk tur beng daiin minute 32-naah si phurh sutna goal a rawn khung.

Real-in goal dang erawh an khung lawk thei lo a, a tawpah Carlo Ancelotti enkawlna hnuaia harhna chang Vinicius hmangin an him hram - league-ah hma an hruai chhunzawm zel a, league match 14 khelh tawhah anmahni hnaih bertu Atletico Madrid aiin point liin an sang zawk mek.

Tluk leh din fawm chunga season hmang mek Atletico Madrid pawhin result duhawm an nei ve leh ta a, Diego Simeone enkawl team hian an mikhualna ramah Cadiz chu 4-1 in an sawp.

Real an hlauthawng
Santiago Bernabeu-ah rin aiin Sevilla an tlangnel a, mikhual team tan Mir chuan minute 12-naah Thibaut Courtois man hman lohin a tauh goal a, mikhualin thawm an nei lian zawk.

Mahse, Sevilla-in tihsual an nei vat a, chu chu striker hriam bik Karim Benzema an ngaihthah chu a ni. Minute 32-naa Eder Militao-a longe range shot chu Sevilla goalkeeper Yassine Bounou chuan dang mah se a perin goal post a per.

A dinna tur hmun taka lo ding Benzema chuan a per lehlam hi awlsam takin goal-ah a lo chantir a, French striker hian tun season inelna hrang hrangah match 18 khelin goal 16 a khung tling ta a, assist vawi riat a nei bawk.

Mahse, Real-in awlsam takin si phurh sut mah se goal dang erawh an khung lawk thei lo a, King Carlo hoin point khatah lungawi an zir mai a ṭul dawn niin a lang hman.

A tawpah Vinicius
Mahse, Real-in Vinicius an nei a, Brazilian forward hi a beidawng ve duh lo. Kum 21 mi forward hian hun tawp nan minute thum chiah a awm tawh tihah goal a rawn khung a, Sevilla an tlawm.

Real coach hlui Julen Lopetegui enkawlna hnuaia khel Sevilla hian goal hnihna an chhuah hnuah pawh hian minute tlem tawh mah se an tha an thlah mai bik lo - Courtois chuan Thomas Delaney tauh goal tur nia lang chu ṭha zetin a dansak.

A tawpa Real lawmna chu Vinicius a ni a, Brazil international hian tun season inelna hrang hrangah match 19 khelin goal 11 a khung tling ta a, a career-a season khata goal a khung hnem ber a ni - assist vawi sarih a nei tel.

Real a pan hnuah phei chuan Vinicius hian season khata goal ruk aia tam khung a la nei ngai lo a, tun season-ah a thai chhe chiang hle - Real-in rawlthar beiseiawm tia an lakluh player hian theihna a lo neihsanzia a lang zel a, lawmthu hrilh tur an nei a nih chuan season ṭan dawna coach tura an koh kir Ancelotti chu lawmthu hrilh tur a ni ngei ang.

Atletico an chak e
Champions League aṭanga tla thei dinhmunah an ding a, league match hnuhnung pangaah vawi hnih chiah an chak bawk - mahse, Pathianni zanah Simeone-a naute kaih harhin an awm a, Cadiz khelmualah an chak chiang hle.

Atletico hian goal khung tur erawhin second half an nghah thlen a la ngai tho a, goal an khung hnuah erawh an hawikir tawh lo - Thomas Lemar chuan hma hruaiin minute 56-naah a khung a, Antoine Griezmann, Angel Correa leh Matheus Cunha ten an khung ve zui bawk.

Mikhual team-in goal li an khung hnuah Cadiz tan Anthony Lozano chuan khung ve leh mah se mualpho zualpui khuhna chauh a ni a, point thum hlawh chhuaktu Atletico-in an nomawi humhim beiseina thi lek lek tawh chu an chhem nung ve leh ta.

Atletico lawmna belhchhah turin Griezmann-a'n goal a khung ve leh ta a, Barcelona-a beisei phak lo forward hian Atletico tana a match hnuhnung pariatah goal nga a khung a, assist vawi khat a nei bawk.