Curry-a'n 3 points vawi 100 nei tling leh der tawh

Stephen Curry chuan nimin zing khan Los Angeles Clippers lakah point 33 neiin Golden State Warriors chu 105-90 in hnehna a chanpui. NBA regular season kal laiah Curry-a'n match 19 aṭangin 3 points vawi 105 a nei leh der tawh.

American point guard Curry hian tun hmain season tir lama 3 points vawi 100 nei tling rang ber record a lo siam tawh, a record hmasa hi khumin tunah chuan match 19 aṭanga mellung a phun hi record thar a ni leh ta.

Warriors hian season bul an ṭan fuh hle a, match 18 chak tawhin ṭum hnih chiah tlawm an nei. Anni aia chak hnem an awm lo, an match lehpekah chuan tun hnaia match 16 chak zawn tawh Phoenix Suns an hmachhawn leh ang.

NBA Most Valuable Player vawi hnih ni tawh Curry chuan, "Mimal record hi chu a hlu, chutihrualin team record hi a pawimawh lai ber zawk chu a ni," tiin a sawi a, mimal aia team a ngaih pawimawh thu a sawi.

Inkhel dangah LeBron James-a'n point 33 neiin Los Angeles Lakers chu Detroit Pistons lakah 110-106 in hnehna a chanpui. Milwaukee Bucks, Memphis Grizzlies leh Boston Celtics te pawhin an khingpui ṭheuh an hneh ve bawk.

NBA Results
Golden State Warriors 105 - 90 Los Angeles Clippers
Los Angeles Lakers 110 - 106 Detroit Pistons
Milwaukee Bucks 118 - 100 Indiana Pacers
Memphis Grizzlies 128 - 101 Sacramento Kings
Boston Celtics 109 - 97 Toronto Raptors