AC Milan an che fuh thei lo

Season bul ṭan ṭha viau mah se tun hnaiah AC Milan an che fuh hleithei lo. Stefano Pioli naute hi an mikhual Sassuolo lakah 3-1 in an tlawm a, tun hnaia Serie A an khelh hnuhnung pathumah chak ni hmel an hmu lo.

Pathianni zan San Siro-a inkhelah Milan lamin captain Alessio Romagnoli hmangin goal nei hmasa mah se, mikhual lamin Gianluca Scamacca hmanga an sut bakah defender Simon Kjaer chuan anmahni lamah a ti lut.

Italy international Domenico Berardi-a'n an goal thumna a khung hnuah Romagnoli chu Gregoire Defrel laka a foul avangin hnawhchhuah a ni a, si an phurh bakah player kim lo an nih hnuah Milan an tho chhuak thei tawh lo.

Milan hi Inter Milan nen an inhnehtawk hnuah Fiorentina lakah an mualpho a, tunah Sassuolo lakah an tlawm. Serie A table-ah pahnihna la ni tho mah se an hnuaia awm Inter nen an inkarah point khat chauh a awm tawh.

Inkhel dangah Napoli chuan an mikhual Lazio chu 4-0 in an sawp. Dries Mertens-a'n goal hnih a khung bakah Piotr Zienlinski leh Fabian Ruiz ten goal khungin, league hmahruaitu an nihna an sawhnghet.

Napoli hian an khelmual pawnah Diego Armando Maradona lim (status) an pho chhuak a, an legend puala hun an hman zana hnehna an chan hi Naples khawpui tan chuan chanchin ṭha leh duhawm bik a tling ngei ang.

Team captain Lorenzo Insigne chuan, "Kei chauh ni loin team player zawng zawng hian nuam ti takin football kan khel, a rah chhuah chu result ṭha a ni. Inter Milan nen kan inkhelh ṭum khan kan tihsual vangin goal kan chhuah, tunah chuan kan insiamṭha nghal.

"Kan thinlunga Diego hre reng chungin match kan khel a, goal li khungin kan lamah a lut miah lo. Player ropui ber hriatreng nan chuan inkhel duhthusam a ni," a ti. Napoli hian Maradona hming chawiin an stadium pawh 'Diego Armando Maradona Stadium' tiin an thlak tawh.