A la danglam vek thei - Eddie Howe

Newcastle United manager Eddie Howe chuan an club dinhmun chu siamṭhat theih a la beisei. Premier League match khelh hmabak 25 an la neih aṭangin a tam thei ang ber point hmuh an tum thu a sawi bawk.

EPL match 13 an khelh tawh chinah Magpies chiah hi chak ni hmel la hmu lo an ni, point ruk chauh la neiin table-ah a hniam ber an ni. An insiamṭha thuai a nih loh chuan club neitu hausa tak ni chung siin an tlahniam daih thei dawn.

Howe chuan, "A pawimawh ber chu vawi khat chak phawt a ni a, chumi hnuah chuan a indawtin thil a lo kal tawh mai ang. A rang thei ang berin hnehna chan kan tum tur a ni, hun rei tak nghah a rem tawh lo.

"Football-ah chuan thil a kal tluan leh kal tluan loh laklawh lai a awm thei, kan mangchhia pawh hi engtik niah emaw chuan kan la thawh san ngei ang," tiin a sawi a, tun hnaiah zawi muanga hmasawnna an neih thu a sawi tel bawk.

Newcastle hian zanin dar 1:30 hian St James Park-ah Norwich City an lo mikhual dawn, an mikhual tur hi an chung chiaha awm lai an ni. Howe-a naute tan mahni mualah ngei chak theihna remchang a inhawng dawn niin a lang.

Zanin dar 1:45 hian Leeds United pawhin Crystal Palace an mikhual dawn. Leeds manager Marcelo Bielsa chuan Patrick Vieira enkawl Palace lakah fimkhur taka an khelh tur thu a sawi.

Bielsa chuan, "Patrick awm hnuah Palace khelh dan a danglam, kalphung mumal tak neiin team nghet tak an ni tawh. Manager chuan thil tum leh duh dan kan nei ṭhin, tun dinhmuna Crystal Palace tana a hna thawh dan hi chu ka lawmpui.

"A duhthusam leh suangtuahna angin a la khelhtir vek thei lo a ni mai thei, mahse awmze neia team a rem hian min tilawm," tiin an khingpui tur manager a fak a, khelmual chhungah erawh hnehna changtu zawk nih ngei a tum ang.