Cavani leh Silva an chhuak dawn chiang

Paris Saint-Germain sporting director Leonardo Araujo chuan an senior player pahnih Edinson Cavani leh Thiago Silva te chu tun season tawp rualin an chhuak dawn tih a sawi chiang.

Uruguay international striker Cavani hi kum 33 mi a ni tawh a, Brazilian defender Sliva hi kum 35 a ni tawh thung. Player pahnih contract neih lai hi June thla hian a zo fel dawn a, an contract zo mah se tun season chhung chu Paris club-ah an awm tluan dawn.

Covid-19 vangin Ligue 1 an titawp fel tawh, champion lai PSG kutah bawk nomawi hlan an ni. League zo tawh mah se French Cup, League Cup leh Champions League quarterfinal chin khelh tur an la nei.

Leonardo chuan, "Thiago Silva leh Edinson Cavani te hi PSG tan chuan player hlu leh sulhnu nei ṭha an ni, hun rei tak chhung min chamchilh tawh an nih avangin an boruak pawh lian hle.

"Zin kawng ngaihnawm leh thui tak kan zawhho tawh a, tunah chuan a lo tawp dawn ta. An tel lo chuan PSG tan pawh kal thiam a harsa mai thei, chutihrualin club leh player hi inhrethiam tawn takin kan inthlah a ngai," tiin a sawi.

Kum 2013 khan Napoli aṭangin Cavani hian PSG hi a zawm a, goal 200 khungsak tawhin club tana goal khung hnem ber a ni - a kum tam deuh tawh mah se Atletico Madrid nen sawizawm a ni a, club dang pawh khelhna tur a hmu ang tih a hriat theih.

Defender Silva pawh season tluana chhawr chi ni tawh lo mah se player ṭangkai a la ni phak dawn a, a club hlui AC Milan nen tun hnaiah an sawizawm nasa hle. Serie A lamah kan hmu leh a nih pawhin a mak lo ang.