Lewy tan chawimawina thar
Robert Lewandowski-a'n 2021 Ballon d'Or dawng lo mah se, award siam thar 'Striker of the Year' chu hlan a ni. Season hmasa khan goal 64 ngawt a khung a, amah hnaih bertu Kylian Mbappe aiin goal 18 zeta a khung hnem a vangin a award dawn nen hian a inhmeh hle.
Bayern Munich striker Lewy-a'n Bundesliga bikah goal 41 a khung avangin 2021 Golden Boot a lo dawng tawh bawk, goal khung kawngah bik chuan tun lai khawvelah ani aia ṭha an awm thei lo ang.
Rawlthar duhawm
Chau thei lo ang maia an sawi Pedri pawhin award a hum haw. Spain international hian kum 21 hnuai lam zinga a ṭha ber chawimawina 'Kopa Trophy' chu a dawng a, lawmman dawng tur hian Jude Bellingham leh Jamal Musiala te a khum.
Kum 18 mi Pedri hi season hmasa khan Barcelona tan rinrawl a ni a, club bakah Spain tan Euro 2020 leh Tokyo Olympic-ah feh chhuakin player pawimawh berte zinga mi a ni phak - hmabak a nei eng takzet.
Kopa Trophy hi 2018 aṭanga siam ṭan kha a ni a, an sem hmasak ber ṭum hian Kylian Mbappe-a'n a dawng; 2019 khan Ajax captain hlui leh Juventus defender ni ta Matthijs de Ligt kutah hlan a lo ni tawh bawk.
Award dang
Gianluigi Donnarumma hnenah Yashin Trophy hlan a ni. Italy international goalkeeper hian Euro 2020 khelh zawh takah khan an ram a champion pui a, chawimawina sang Best Player a dawng hial - tunah award a dawng zui leh hi a mak hran lo.
AC Milan chhul chhuak Donnarumma hian Paris Saint-Germain a zawm hnuah hmun nghet a la chang mai bik lo, nikum lama a sulhnu hnutchhiah erawh sawi nep theih a ni chuang lo - Yashin Trophy hi 2019 aṭanga siam ṭan niin Liverpool keeper Alisson chuan a lo dawng tawh.
Season hmasa Champions League champion Chelsea hnenah Club of the Year chawimawina hlan a ni. An player ten mimal chawimawina dawng chiah lo mah se Blues tan chuan team award dawn hi thil lawmawm a ni ngei ang.
Hmeichhe lam
Barcelona captain Alexia Putellas chuan hmeichhe tana siam Women's Ballon d'Or a dawng, nikuma Champions League final-a Chelsea an hneh ṭumin goal hnih a khung a, hlawhtlinna an chan theih chhan langsar a nih avangin award dawn hi a phu.
Kum 27 mi Putellas chuan, "A bul ṭanna chauh a ni, kei hi Barcelona player zinga hetiang dawng hnuhnung ber hi ka ni lo ang, ka tih ang ti thei hi tam tak an la awm dawn," tiin an squad a ṭhat bakah player naupang ṭha an ngah thu a sawi.
Putellas-i hian 2020-21 season khan inelna hrang hrangah goal 26 a khung, a chet ṭhat em avang hian UEFA Women's Player of the Year leh Midfielder of the Year pawh a lo dawng tawh bawk.