Benitez ban theitu tur a club hlui!

English football-a match 'hot' ber pawl Merseyside derby chu zanin dar 1:45-ah khelh a ni dawn a, tun hnaia result nei ṭha thei lo Everton chuan goal khung nuam ti tak Liverpool an lo mikhual dawn.

Everton boss Rafael Benitez hi Liverpool fans tam zawk thinlungah a thi thei lo a, Reds a enkawl laiin league nomawi chawi lo mah se kum 2005-a ropui taka Champions League nomawi a chawipui kha an la hre reng.

Hei vang hian an hmelma club a pan chung pawhin fans tam takin an ngaidam a, an ngainat ngaiin an la ngaina reng - mahse, zaninah Liverpool chu an coach hlui ban thei dinhmunah an ding dawn!

Everton hian league match sarih chhung chu a zawnin hnehna an chang zo tawh lo a, Benitez hoin an tlusawp mek. Liverpool an mikhual zui dawn a, an hmelma club lakah an tlawm a nih ngat chuan Benitez hi ban a nih pawhin mak ti suh.

Hmanlai thawnthu
Merseyside derby chanchin ringawt pawh ziak dawn ila, ziah fe tham a awm - tun dinhmuna he inkhel boruak chawisangtu erawh Benitez a ni a, Spanish manager-in ngaihven a hlawh.

Benitez hian Liverpool a enkawl laiin Everton hi 'club tenau' tiin a lo sawi tawh a, hei vang hian Toffees enkawl tura ruat a nih pawh khan Everton fans tam takin an duh lo.

Mahse, transfer bazar-a pound maktaduai 1.7 lek seng chungin league match hmasa parukah vawi li a chakpui thei a, vawi khat chiah tlawmin vawi khat draw a nei a, fak rawn a hlawh.

Mahse, Manchester United 1-1 a an inhnehtawkpui hnuah league match ruk an khel a, vawi khat draw an nei tih loh chu an tlawm vek - Everton fan-ten Benitez thusawi hlui an herlum a, Spanish coach ban duhna thawm a ri leh ta.

A harsa dawn
Liverpool-in an league match hnuhnung pahnihah goal riat an khung a, an lamah a lut miah lo thung - zaninah Everton lakah zahngaihna lantir an tum lo ang tih a chiang a, Benitez leh a naute tan a awlsam dawn lo.

Reds manager Jurgen Klopp chuan, "Everton nena inkhel chu game dang daih ang a ni ṭhin. Rorum taka football khelh hi nuam ka ti a, mahse, Merseyside derby-ah chuan a uchuak mah mah a ni. Everton khelh hi nuam ka ti ngai lo," a ti a, a fimkhur ang.

Mahse, Klopp hian hliam vanga Naby Keita, Joe Gomez, Harvey Elliott, Roberto Firmino leh Curtis Jones te a chhawr thei lo chungin harsatna a tawk lo a, a squad a chhah tih a lang.

Tlarhmaah Mohamed Salah (11 goals), Sadio Mane (7) leh Diogo Jota (7) te hi Premier League-a goal khung hnem top three-ah an lang mek vek a, Everton tan anni dan hi a awlsam lo ang.