Lukaku hun a inṭan dawn?

Premier League hmahruaitu Chelsea-in Manchester United an mikhual ṭumin point thum an hlawh chhuak thei lo a, league table chung bera awm chhunzawm turin zanin dar 1:00-a Watford an hmachhawn hunah chak ngei a ṭul dawn.

Nipui bazarah Chelsea-in pound makta-duai 97.5-in Romelu Lukaku an lalut a, Belgian striker hi October 20-a Malmo nen an inkhelh ṭuma a inhliam avangin thla khat bawr vel a chawl. Lukaku hi kar liam ta khan bench aṭangin a rawn lut a, Watford an hmachhawn hunah chuan bul a ṭan theih a rinawm.

Kum 28 mi Lukaku hian league-ah goal thum a khung tawh a, top scorer ni tura elpui dang Mohamed Salah (11), Jamie Vardy (9), Sadio Mane (7), Diogo Jota (7) leh Michail Antonio (6) te nen an inkar a hlat ṭan avangin goal khung leh thuai a mamawh.

Lukaku-a'n goal a mamawh ang chiahin Chelsea-in chak an mamawh a, Blues hian player inhliam nei ve bawk mah se anmahni aia Watford-in hliam an ngah zawk avangin chhuanlam neih a thiang lo.

Claudio Ranieri hote hian an match hnuhnung berah Leicester City 4-2 ngawtin an hneh lo a, chutihrualin an mual Vicarage Road-a an inkhelh hnuhnun berah 4-1 ngawtin Manchester United an sawp. Thomas Tuchel-a hote tan point thum hmuhna remchang turah a ngaih theih a, chutihrualin Burnley leh Manchester United laka chesual tawh Blues tan fimkhur a ṭul ang.