Gerrard tan fiahna hautak a inchhawp

Steven Gerrard-a'n Premier League-a coach anga a kir hnuah tlawm a la nei lo a, Aston Villa boss thar hian a league match hmasa pahnihah a team hi a chakpui ve ve.

Rangers boss hluiin a hneh tak team pahnih hi season hmang ṭha tak Brighton & Hove Albion leh Crystal Palace te an ni a, Liverpool captain hlui hian fak a hlawh phah hle.

Mahse, fiahna tak takin Gerrard a la hmuak cheu a, zanin dar 1:45 hian khawvela coach ṭha ber pawl Pep Guardiola enkawl Manchester City an mikhual dawn - a awlsam dawn lo.

Manchester United legend Rio Ferdinand chuan, "Villa player-te chu Gerrard-a hnuaia an training danah an hlim hle tih ka hria a, Gerrard leh a coaching staff te thawhpui nuam an ti hle.

"Tunah chuan khelhchhuah dan tur tak tak an hriat phah a, an thawhhona a ṭha hle a ni," tiin a sawi a, he boruak ṭha hian eng chen nge a daih dawn zaninah a hriat ang.

Player a nih lai pawha huaisen taka thutlukna siam ṭhin Gerrard-a'n match hnih chhung lekin thutlukna huaisen taka siam a inthlahrung lo tih a pholang leh der tawh.

Palace lakah tun season-a a vawi khat nan kum 36 mi winger Ashley Young chu bul a ṭantir a, an pahnih man belhkhawm ringawt pawh pound maktaduai 68 lai tling Danny Ings leh Emi Buendia te chu Selhurst Park-ah hian bench-ah a dah hmak bawk!

Mahse, zanina an hmachhawn tur erawh City an ni a, chak tum ai chuan point khat hlawhchhuah tum chu Gerrard tan thutlukna fing a ni mai thei.

Gerrard hian, "Chona a hautak poh leh kan phur tur a ni," tiin a lo sawi tawh a, "Mi tam tak chuan pressure min pek belhchhah an duh mai thei a, mahse, chu chu ka hmachhawn châk tawh a ni," tiin Villa a enkawl dawn khan a sawi bawk!

Coach huaisen, kum 41 mi lek ni chunga result nei ṭha chho mek hian khawvela coach ṭha ber ang hiala chhal Pep a hmachhawn dawn tih erawh hriat tel sak a ṭha - City hi an league match hnuhnung pathumah an chak vek a, table-ah pahnihna an ni mek bawk.