Kar riat chawl tur Neymar

Paris St-Germain forward Neymar chu a hliam endik a nih hnuah a chawlh chen tur an puang a, a kerek hliam vang hian a rei lo berah chawlh kar riat chhung vel tal chu a chawlh a ngai dawn.

Kar tawp Ligue 1 inkhelah PSG hian Saint-Etienne chu 3-1 in an hneh, he inkhelah hian kum 29 mi Neymar hi zawn chhuah ngai khawpin a hliam a, thlalak aṭanga a lan dan phei chuan hun rei tak chhung a chawlh a ngaih a rinawm hial.

PSG chuan thuchhuah siamin, "Neymar-a kerek vei lam hliam chu endik a ni a, a lan dan chuan chawlh kar ruk aṭanga kar riat chhung vel a chawlh a ngai ang. A dinhmun hi ennawn leh a ni dawn a, uluk taka enkawl a ni ang," an ti.

PSG hian Ligue 1 lamah point 12 zetin hma an hruai fal mek a, Champions League last 16 an lut chiang tawh bawk. Tlarhma lamah Lionel Messi, Kylian Mbappe leh Angel di Maria te an la awm tho avangin an buai phah lo tura ngaih a ni.

Mauricio Pochettino naute hian zanin dar 1:30 hian league match khel turin Nice an mikhual zui dawn a, forward Neymar inlan thei lo mah se, midfielder Marco Verratti leh Georginio Wijnaldum te an dam tawh.