NorthEast United veltu Lianzuala goal mawi

Mizo tlangval Lallianzuala Chhangte chuan Indian Super League-ah Chennaiyin tan goal a khung a, NorthEast United lakah South Indian club hi 2-1 in hnehna a chanpui.

Lunglei tlangval Lianzuala hian minute 41-naah goal hmahruai a khung a, Highlander lamin VP Suhair hmangin an chhanglet.

Mahse, Chennaiyin tan captain Anirudh Thapa chuan minute 74-naah goal khat a khung ve leh a, hun tawp thlenga goal dang lut tawh loin Chennaiyin an chak.

Highlander an tlawm leh tak avangin match thum an khelh aṭangin point khat chiah an la nei a, Chennaiyin erawh match hnih an khelhah chak ve vein point ruk an nei ta.

Mizo tlangval
Chennaiyin tan Lallianzuala Chhangte leh Jerry Lalrinzuala ten inkhel bul an ṭan ve ve a, player pahnih hian an khel ṭha dun hle - minute 13-naah Lianzuala kan hmu nghal a, chance duhawm a nei.

Lunglei tlangval hian mual ding lam sirah ball changin a tlan luhpui a, ṭha zetin shot nei mah se Highlander keeper tawnhriat nei ṭha Subasish Roy Choudhary chuan ṭha zetin a lo dansak.

Minute 41-naah erawh kum 35 mi keeper hian Lianzuala a dang nawn tawh lo. Tun hnaia Igor Stimac-a'n India tana khel tura a hmuh kan forward hian Blue Tigers jersey ha turin a ṭha tawk tih a pholang.

NorthEast United midfielder, Mauritania international ni bawk Khassa Camara chu ball chhuhsakin goal-ah a pet zui a, goal mawi bik a thlawh lut - Subasish tan tih theih a awm lo.

Goal hnih dang
Highlander-in hnufual reng an duh bik lo - Suhair Vadakkepeedika chuan minute 50-naah Chennaiyin keeper Vishal Kaith chetsual zarzoin si phurh sutna goal a khung a, an phur sawt.

NorthEast United-in si phurh an sut hnuah hmahruaina goal khung theihna hun remchang an nei a, mahse, Gurjinder Kumar-a longe range shot-in post a per let lehlam chu Lalkhawpuimawia'n holam takin a hlah.

Minute 46-naa luhtir Kelkang tlangval ke hmui zan a ni lo a, Mapuia hian chance dang pawh nei mah se goal-ah a chantir thei lo a, hming chherna remchang a neih chu a khawhral.

Mapuia'n chance duhawm a hlah laiin Chennaiyin midfielder Thapa erawhin a hun ṭha neih a hlah ve duh lo a, minute 74-naah chakna goal a khung.

Vanduai vang
NorthEast United-in an match hmasa bera Bengaluru (4-2) an ngam loh hnuin Kerala Blasters (0-0) an inhnehtawkpui a, Chennaiyin (2-1) lakah an tlawm leh ta.

ISL-a Indian coach nghet hmasa ber Khalid Jamil-a'n a beisei angin bul a ṭan thei lo a, hetihrual hian point thum an la hlawhchhuah loh chhan chu an vanduai vang a nih thu a sawi.

Highlander hian Chennaiyin lakah hliam vangin striker chhuanvawr Deshorn Brown an chhawr thei lo a, minute 25-na lekah hliam vangin fan-te atchilh rawn Federico Gallego chu hliam vanga lakchhuah a ngai bawk.

Khalid chuan, "Gallego kan chân kha a pawi em a ni. A khelh lai khan game kan thunun a, mahse, hliam vanga lakchhuah a ngaih takah chuan midfield leh tlarhma an inman tawk lo a, Gallego chhuak kha result danglam chhan pakhat a ni," a ti.

Lianzuala a hlim
Chennaiyin tana goal mawi bik khungtu Lianzuala hi Hero of the match-a thlan a ni a, tun season ISL-a Indian player zinga Hero of the match-a thlan pathumna chiah a ni.

Lianzuala chuan, "Kan result hian inrintawkna min pe a, ram pawn player chauh ni loin, Indian player pawhin goal khung kan thiam ve tho tih kan pholang bawk," a ti a, Indian player-ten theihna sang tak an neih thu a sawi lang.

Lunglei tlangval hi minute 90-naah lakchhuah a ni a, left back-a bul ṭantu Jerry erawh a khel tluan thung. Highlander lamah R. Laldanmawia'n bul ṭan mah se minute 46-naah lakchhuah a ni.

Hetihlai hian second half ṭan tirah Mapuia luhtir a ni a, goal hnihna an chhuah hnu, minute 78-naah Rochharzela chu luhtir a ni bawk - danglamna erawh a thlen thei ta bik lo.