Djokovic a inlan lo mai thei

Australian Open 2022 khelh nan thla khat vel bak a awm tawh lo. Champion lai Novak Djokovic chu hrileng inkaihhruaina vangin inlan lo thei dinhmunah a ding mek, a inlan lo a nih pawhin a mak lo ang.

Tournament buatsaihtu lam chuan Covid-19 laka invenna vaccine la lo tan Australian Open a khelh theih loh tur thu an sawi, inkaihhruaina hi siam danglam tum deuh mah se sorkar thuneitu lam duhdan an ngaihchan tel a ngai.

Djokovic-a pa Srdjan Djokovic chuan, "Tuna ruahmanna leh inkaihhruaina mak tak hnuaiah chuan a inkhelh a rinawm loh. Kei chuan vaccine lak hi ṭul ka ti lo, ka fapa pawhin ngai a ti lo. Thutlukna erawh ani leh thuneitu lam siam tur a ni," tiin a sawi.

Serbian star Djokovic hian Australian Open nomawi hi vawi kua ngawt a chawi tawh a, champion hnem ber a ni. Nakkumah pawh hian inlan ni se la chuan champion tura rinkai ber a ni leh ang.

Grand Slam nomawi chawi hnem lamah Roger Federer, Rafael Nadal leh Djokovic te hi an intluk tawk mek, major title hi vawi 20 ṭheuh an chawi tawh - Novak tan record thar siam theihna remchang tur tak chu a ni.

Spanish tlangval Nadal-a'n Australian Open khelh a tum thu a sawi chiang tawh a, hliam vanga chawl lai Federer erawh a inlan dawn lo tih a chiang tawh thung - tunah chuan champion lai Djokovic dinhmun kan ngaihchan leh rih a ngai dawn.