Footballer 13-in Covid-19 thar an kai

Portuguese club Belenenses player 13-te chuan Covid variant Omicron an kai tih finfiah a ni a, Covid-19 chi dang hmuhchhuah a nih avang hian Europe ram ṭhenkhatah chuan inkhuahkhirhna khauh zawkin kalpui a ni leh ṭan.

Belenenses hian Covid-19 vanga buaina an tawk chungin inkhelh Benfica nen luihtir an ni a, hri leng vangin player 17 ngawt an chhawr theih loh avangin player pakua chauhin an khel. Halftime-ah team ṭha zawk Benfica-in 9-0 in hma an hruai tawh a, Belenenses player pathum an inhliam avangin player paruk chauh khel thei an awm tawh a, FIFA dan angin khelh zui theih a ni tawh lo.

Benfica president Rui Costa chuan, "Thil thleng hi pawi ka ti a, Portuguese football-a hun thimah ka ngai. Inkhelh hi a tir aṭang reng khan sawn theih a ni," tiin inkhelh luihtir an nih thu a sawi. Manchester City midfielder Bernardo Silva pawhin inkhel sawntir a ni mai lo chu mak a tih thu a sawi ve bawk.

Hri leng vangin inkhelh zawh theih a ni lo a, Belenenses-in chanchin duhawm loh an hre zui. An player zinga 13 ngawt chuan hri leng thar Covid variant Omicron an kai tih hmuhchhuah a ni.

Club thupuangtu tarlan danin player leh staff 44 te chu Covid-19 vangin na inkhung hrang mek a, khung hran zingah natna lang chhuak leh chhuak lo an awm. Covid-19 hri leng vangin Olympic leh European Championship khelh hun sawn a ni tawh a, hun rei tak entu awm loin club football khelh a ni bawk.

Covid variant Omicron kai zinga mi defender Cafu Phete chuan international break lai khan an ram South Africa tan a khel a, South Africa hi Omicron hmuh chhuah tamna hmun a ni. South Africa aṭanga hri leng thar darh dan an zirchian a ni ang a, Europe ram chauh ni loin India ram thlengin a nghawng theih dan a awm ang.