Club World Cup khelh hun a chiang

FIFA Club World Cup chu February-ah khelh a ni dawn tih tihchian a ni ta a, United Arab Emirates-a neih tur inelna hi February 3-12 inkara khelh zawh tura ruahmanna siam a ni.

European champion Chelsea-in semifinal aṭangin inelna an hmachhawn ṭan dawn a, Al Hilal, Al Jazira leh Auckland City zingah an hmachhawn ber tur a la chiang rih lo. Club World Cup-ah hian khawmual tina champion bakah inelna thlengtu ram league champion-te an inel ṭhin.

February-a inelnaah hian Chelsea bakah South American champion Palmeiras, Asian champion Al Hilal, African champion Al Ahly, CONCACAF champion Monterrey, Oceania aiawh Auckland leh UAE champion Al Jazira te an inlan dawn.

CWC hi first round aṭanga khelh ṭan a ni dawn a, round khatnaah hian inelna thlengtu league champion Al Jazira leh Oceania aiawh Auckland te an inkhel ang - OFC chuan Champions League a huaihawt thei lo a, Auckland hi khawmualpui aiawha inlan turin a thlanin an thlang.

Second round-ah hian Asian champion Al Hilal chu lut sain Al Jazira leh Auckland inkhela chak zawk an tum dawn a, lehlamah second round lut sa ve ve African champion Al Ahly leh CONCACAF champion Monterrey an inkhel bawk ang.

Chelsea leh Palmeiras chu semifinal lut sa an ni a, second round inkhela chak zawk team hi an tum dawn - semifinal khelh ni tur tak hi tihchian a la ni lo.

English club zinga Club World Cup champion lo ni tawh chu Liverpool (2019) leh Manchester United (2008) an ni a, Blues-in club ropui pahnih hnungzui theihna remchang an nei dawn.

Hetihrual hian February-a CWC khelh a nih dawn avangin Chelsea-in February 8 zan (1:15 AM vs Brighton & Hove Albion) leh February 12 zana (8:30 PM vs Arsenal) league match an neih chu khelh hun sawn a ngai dawn tihna a ni.

CWC hi February 6-a khar tur Africa Cup of Nations nen a innan dawn avangin Blues hi keeper Edouard Mendy (Senegal) leh winger Hakim Ziyech (Morocco) tel loin an khelh a ngai dawn tihna a ni a, African champion Al Ahly phei chu an first choice player zahve deuhthaw awm loin an inlan a ngai dawn!

Hetiang a nih avang hian Egypt leh Tottenham Hotspur striker hlui Mido chuan AFCON neih laia CWC neih chu, "African football zah lohna a ni," tiin a sawisel a, na takin FIFA a dem.

Club World Cup hi December-ah Japan-a khelh tura tih a ni a, mahse, Covid-19 vangin Japan hi an inhnukdawk a ni.