Real leh Vini Jr inlan hun

Zanin dar 1:30 hian Santiago Bernabeu-ah Real Madrid-in Athletic Bilbao an mikhual dawn. Carlo Ancelotti hote hi La Liga hmahruaitu an ni a, pakhatna dinhmun sawhngheh nan point thum hlawhchhuah a pawimawh ang.

Tun season-a Real Madrid tana che ṭha ber chu Karim Benzema a ni a, French forward hian inelna hrang hrangah goal 16 khung tawhin club top scorer a ni mek. Ballon d'Or chawimawinaah pawh Benzema hian palina a hauh pha a, Los Blancos chhuanvawr hi amah hliah khuh ṭhintu Cristiano Ronaldo chungah a awm.

Chutihrualin sawi hmaih theih hauh lo erawh Vinicius Junior a ni a, Brazilian winger hian kartawpa Sevilla an hneh ṭumin minute 87-naah chakna goal a khung. Kum 21 mi Vini Jr hian tun season-ah goal 11 a khung tawh a, hemi hma season hnih belhkhawha Real Madrid tana a khung zat nen a intluk chiah. Bilbao lakah pawh Vini Jr hian hmun pawimawh a chan ngei a rinawm.