Lewy leh Muller tel lohna Bayern chak

Bayern Munich-in Robert Lewandowski leh Thomas Muller te an chhawr thei lo chungin Inrinni zan khan Borussia Monchengladbach 2-1 in an hneh a, Bundesliga nomawi humhim turin June 16, Thawhlehni zana Werder Bremen hneh a tawk.

Allianz Arena-ah rawlthar Joshua Zirkzee goal hmangin Bayern-in hma an hruai a, Benjamin Pavard-a'n an lamah a tihluh avangin halftime-ah 1-1 a ni. Hun tawp hma hretin Leon Goretzka-a'n Bavarians chakna goal a khung a, Hansi Flick-a hoten point thum hlu tak an hlawh chhuak

Bayern-in nomawi pathum Bundesliga, DFB Pokal leh Champions League an la chawi thei a, league lamah Hansi Flick ngaih a ngam tih a player thlan dan aṭangin a hriat. Flick hian Muller leh Lewy an chhawr thei lo chungin left back hmuhnawm Alphonso Davies a awltir a, tawnhriat nei ṭha pahnih aiah kum 19 mi Zirkzee leh kum 20 mi Mickael Cuisance a luhtir.

Bavarians-in tlarhmaah Lewy, Muller, Gnabry leh Kingley Coman te an chhawr tlangpui. Champions League khel thei tur zinga mi Gladbach hmachhawn turte erawh Zirkzee, Gnabry, Cuisance leh Perisic te an ni a, Bayern ṭhat dan ber a ni lo.

Borussia Monchengladbach-in goal leh assist 10 ve ve nei tawh Alassane Plea an chhawr thei lo a, Bayern nena an danglamna erawh Marco Rose-a'n season thara Champions League khelh ngei tumin a chhawr theih china ṭha ber a thlang.

Mualneitu Bayern-in bul an ṭan ṭha zawk a, French midfielder Cuisance-a'n chance ṭha bik a hlah. Gladbach erawh an vanduai, minute 10-na lekah Bundesliga-a goal 10 khung tawh Marcus Thuram thlak a ngai.

Thuram thlaktu Breel Embolo a tlangnel thuai a, minute 16-naah ball fing tak pe lutin Jonas Hofmann tan siamsakin German midfielder hian goal-ah a chantir. Amaherawhchu VAR hmanga ennawn a nih hnuah Hofmann-a ke hmawr a offside a, goal-ah pawm a ni lo!

Minute 26-naah Gladbach keeper Yann Sommer-a'n hmun him loah ball a pass a, Zirkzee-a'n nang fuh hmasa berin Bayern goal hmahruai a khung. Dutch forward hian goal ruakah khung bawk mah se angle a zim avangin Lewy aia lut Bayern rawlthar hi goal khung thei bik a ni tih a hmuh theih.

Ngaih ṭha takin Bayern an awm hman lo, minute 37-naah Patrick Herrmann-a'n dinglam aṭangin ṭha zetin a cross a, Benjamin Pavard-a'n a lamah a tlawh lut. French defender hian tlawh lo pawh ni se Gladbach player a hnungah a awm avangin a goal tho erawh a rinawm. 

Second half-ah Bayern-in Alphonso Davies, Javi Martinez leh Kingsley Coman te an luhtir a, goal erawh a lut tlai. Minute 86-naah Pavard-a cross nangching turin fing takin Goretzka a tlan lut a, chakna goal a khung. Gladbach-in Allianz Arena-ah point hmu khawpin an khel ṭha a, a tawpah erawh team ṭha zawk danglamna a lang.

Bayern hi February 9-a RB Leipzig nen an inhnehtawk hnuah an la chak vek a, an hneh zingah hian an elpui zinga mi Borussia Dortmund, Bayer Leverkusen leh Gladbach te an tel. Flick-a hote hian match thum hma bakah team nem zawk Werder Bremen, SC Freiburg leh Wolfsburg te an hmachhawn dawn a, vawi khat chiah chak a ngaih tawh avangin a harsa dawn lo.

Chutihrualin Lewy leh Muller tel loin Bayern an ṭha tawk lo. Dutch forward Zirkzee-a'n goal khung ve bawk mah se Lewandowski hmunruak a awl zau a, midfield-ah Muller a awm loh a lang chiang bawk. Bundesliga-a assist ngah ber Muller hi 'Raumdeuter' an ti ṭhin a, chumi awmzia chu hmunruak siamtu tihna a ni.

Kimmich leh Goretzka te anmahni tawkah ṭha ve viau tawh mah se an hmaah Muller a awm loh chuan an goal bawh a na tawk lo a, midfield aṭangin ball chhuak ṭha a tlem phah. Bayern hian DFB Pokal final-ah Bayer Leverkusen an la hmachhawn dawn a, vawi khat chetsual palha nomawi chan theihna a nih avangin Flick-a'n knockout match hmachhawn turin ngaihtuahna a sen ṭan a ṭul dawn a ni.