Ballon d'Or chu Lionel Messi tana siam
A chhanna dang a awm lo, a phu ber Lionel Messi kutah bawk Ballon d'Or chu hlan a ni. Argentina captain hian footballer ṭha ber chawimawina hi vawi sarih a dawnna chiah niin, record nei ṭha ber a nihna chu a belhchhah.
Football ngainatuten Thawhṭanni zan lai khan Paris khawpui an thlir ṭup a, mahni awmhmun aṭangin Ballon d'Or 2021 dawng tur chu bukna hrang hrangin kan lo buk kual a nih kha, player chhawpchhuah zinga khawvel huap journalist 180 ten an dahsan ber chu Messi a ni.
Paris St-Germain leh Argentina forward Messi hian point 613 a hmu, amah hnaih bertu Bayern Munich striker Robert Lewandowski chuan point 580 a hmu thung; an hnungah hian Chelsea midfielder Jorginho (460 points) a awm.
Copa America Champion
France Football-in an buatsaih Ballon d'Or hi tun hmain Messi-a'n vawi ruk - 2009, 2010, 2011, 2012, 2015 leh 2019 te khan a lo dawng tawh. Award a dawn hmasak parukah hian Argentina tana a sulhnu ai chuan Barcelona tana a hnathawh vanga dawn tia sawi ngam a ni.
Ram tan Messi hi a vannei tawk lo. World Cup final thleng mah se goal khat lekin Germany lakah an vanduai; Copa America lamah pawh final an luh hmasa pathumah an tlawm vek - Messi hoin Argentina hian nomawi an chawi thei dawn lo nia ngaih a ni hman.
Mahse maw, 'Engkim tan hun ruat a ni' tih ang khan - Messi tan pawh hun ruat bik a ni. Hripui leng karah Copa America an khel a, a thlengtu Brazil chu an khelmual hman thiamah ngei hnehin Argentina an champion, an captain chu Messi a ni.
Kum 34 mi Messi-a'n 2021 chhungin ram leh club tan inelna hrang hrangah goal 40 a khung a, kum dang aiin a khung tlem deuh a ni mai thei. Mahse, amah sawiseltuten ṭan chhana an neih ṭhin 'Argentina a champion pui thei lo' tih chu a thaichhe tlat - Ballon d'Or a dawng hi a mak lo.
Lewy hming a lam
Nikum khan hripui leng vangin Ballon d'Or hi an sem lo, sem ni se la chuan Bundesliga leh Champions League nomawi chawitu Lewandowski chu rinkai ber a ni. Bayern Munich striker hian kuminah goal 53 khung tawh mah se tun ṭumah chuan pahnihna a nih a ngai.
Ballon d'Or dawngtu Messi chuan, "Lewandowski hming lamrik a ngai, ani nena kan inel thei hi a ropui ka ti. A nihna takah chuan nikum khan Ballon d'Or hi sem ni se la chuan dawn phu leh a awm ber pawh a ni," tiin Lewy sulhnu a ngaihhlut thu a sawi chhuak.
Poland international Lewy pawhin lawmpuina thu sawiin, "Leo Messi ka lawmpui a, ani bakah award dawng thei tura player chhawp chhuahte pawh ka lawmpui. Striker of the Year chawimawina ka dawng thung.
"Mimal chawimawina hi team leh fans ṭha tak nei tan lo chuan dawn theih a ni lo, min thlawptute zawng zawng chungah lawmthu ka sawi," tiin a sawi a, chawimawina hi Lewy hian dawng pawh ni se thil mak a ni hran lo ve bawk ang.
Hetiang dinhmuna din leh theih chu a ropui ngei mai, kum hnih liam ta kha chuan ka hun hnuhnung a nih tawh ka ring a, engtikah nge inkhelh ka chawlhsan ang tih kha khatihlai khan min zawt ṭan tawh. Tunah chuan Paris khawpuiah ngei hlimna vawrtawp ka tawng leh si. Ka tan chuan kum duhawm bik a ni. Maracana stadium-a Brazil hneha Copa America nomawi kan chawi kha a ropui, Argentina mipuite nena nomawi lawm kha a nuamin a hlu takzet, a hlimawm em em bawk. Hun rei tak chhung ka inkhel tawh a, ka tana kum ṭha ber a ni em, tih chu ka sawi thei lo. Mahse, ka hun tawn tawhah chuan Argentina mipuite nena hlima chan kha a nuam, a hmain hun harsa leh sawiselna kan lo tawng ho tawh. - Lionel Messi
2021 Ballon d'Or
Ballon d'Or (Mipa) Lionel Messi Argentina
Ballon d'Or (Hmeichhia) Alexia Putellas Spain
Kopa Trophy Pedri Spain
Yashin Trophy Gianluigi Donnarumma Italy
Best Striker Robert Lewandowski Poland