Mizoram hmeichhe team-in quarterfinal an lut

Hero Senior Women's National Football Championships-ah Mizoramin result duhawm bik an nei a, nimin khan an group-a team ṭha bera ngaih Madhya Pradesh chu 4-0 ngawta sawpin quarterfinal an lut.

Mizoram hian an match hmasa berah inelna thlengtu Kerala 3-2 in an hneh tawh a, match khat khelh hmabak nei chungin knockout stage an lut.

Group G-ah Mizoramin point ruk hmuin pakhatna dinhmun an luah a, anmahni hnaihtu Kerala leh Madhya Pradesh te an hneh ve ve avangin an match hnuhnung berah Uttarakhand hneh lo pawh ni se pakhatna dinhmun an luah chiang tawh.

Nimina EMS Corporation Stadium, Kozhikode-a inkhelah Mizoramin bul an ṭan ṭha a, Kerala laka chakna goal khungtu Lalnunsiami'n minute 11 lekah goal hmahruai a khung.

Mizoramin inkhel an thunun a, second half ṭan aṭanga minute 10 chhungin goal thum dang an khung leh bawk. Elizabeth Vanlalmawii, Zairemmawii Chawngthu leh Grace Lalrampari ten an khung belh a, nuam sa takin an chak.

Mizoram coach Lalrindika Hmar chuan, "Seeded team Madhya Pradesh lakah team ṭha zawk kan ni tih kan lantir a, kan khel ṭha zawk a, chak kan phu zawk. Inelna thlengtu Kerala aiin Madhya Pradesh hi an nem zawk a, kan naute an khel ṭha takzet. Ka naute khelh danah kan lungawi a, chutihrualin kan khelh hmabak atan rilru kan sawrbing lehnghal ang," tiin Vanglaini a hrilh.

November 28, Pathianni
Madhya Pradesh 4 - 1 Uttarakhand
MAD : Madhu Raghav 21'; Arti Rathore 50', 56'; Pallavi Goswami 90+3'
UTT : Bhagwati Chauhan 73'
Kerala 2 - 3 Mizoram
KER : Athulya KV 44'; Femina Rag Valappil 45'
MIZ : Grace Lalrampari 39'; Elizabeth Vanlalmawii 79'; Lalnunsiami 90+3'

Nimin Inkhel Results
Uttarakhand 1 - 3 Kerala
UTT : Bhagwati Chauhan 52'
KER : Vinitha Vijayan 44'; Manasa K 75'; Femina Rag Valappil 86'

Mizoram 4 - 0 Madhya Pradesh
MIZ : Lalnunsiami 11'; Elizabeth Vanlalmawii 46'; Zairemmawii Chawngthu 49' ; Grace Lalrampari 54' (P)

December 2, Ningani
Madhya Pradesh 9:30 AM Kerala
Mizoram 2:30 PM Uttarakhand