Mizoram an chak, Manipur an chak lo
Santosh Trophy NorthEast Zone qualifying round-ah Mizoram chuan nimin khan player 10-a khel chungin Nagaland 1-0 in an hneh a, goal awmchhun hi Lalnuntluanga Bawitlung khung a ni. Group B inkhel dangah inelna thlengtu Manipur chu Tripura-in 2-0 in an barakhaih.
Mizoramin point ruk hmuin hma an hruai a, an hnuaia awm Tripura leh Manipur ten final luh beiseina an nei bawk. Group match hnuhnung ber hi December 2, Ninganiah khelh a ni dawn a, Mizoramin tlai dar 2:00-ah Manipur an hmachhawn dawn. Inkhel dangah Tripura-in tla tawh Nagaland an hmachhawn thung ang.
Buaina a awm
Nagaland-in jersey ni lo zawk an ken avangin a hunah inkhel ṭan theih a ni lo a, darkar khat dawnin inkhelh hun a tlai phah. Inkhelh ṭan hnuah pawh buaina tenau a awm.
Minute nga vel an khel hman chauh tihin Mizoram keeper F. Lalmuanawma'n ball a hnek chhuak a, Nagaland striker-in a hnaih chilh hman avangin referee-in penalty a pe. Mizoram captain Lalrinchhana Tochhawngin a tawnhriat hmang ṭangkaiin assistant referee rawn turin referee a ngen a, penalty pe ta loin goal kick a pe ta zawk.
Nagaland an thinur a, inkhelh chhunzawm duh loin referee an vau tel bawk. Inkhelh chawlh lailawk a ni a, darkar chanve vel an chawlh hnuah inkhelh an chhunzawm leh chauh.
Inkhel a nung
Match referee-in inkhelh ṭantirh lamah thutlukna a sut avangin pressure a ngah a, Mizoram player-ten an tawrh phah. Tripura laka goal awmchhun khungtu Lalhriatpuia chu inkhelh ṭan leh hnu lawkah foul satliahah yellow card a pe a, referee hian pressure a zawh loh avangin fourth official-in a thlak hial. Minute ruk hnuah referee tharin goalkeeper ball pet chhuak tur bula a zuan avangin Hriata hi yellow card a pe leh a, referee hian yellow card hmu tawh tih hre sa se yellow card vawi hnihna hi a hmu kher lo ang.
Player 10-a khel chungin Mizoramin an nawr ngam a, Laleng-zama corner pet chu Tluanga'n a tauh goal. Lunglei tlangval pahnih hi AIFF Elite Academy bakah Bengaluru FC reserve team thlenga khel dun ṭhin an ni.
An ṭang tluan
Nagaland-in an tamna hmang ṭangkaiin na zawka nawr an tum a, amaherawhchu Mizoram an ṭang khawng ve tlat a, midfield-ah Hnahthial tlangval K. Lalrinfela bakah goal khungtu Tluanga leh Zama te an ṭangkai hle.
Nagaland tamna a lang a, chance ṭha bik ṭum khat an nei a, goal zawnah an pet lo. Chutihrualin Mizoram tan bench aṭanga lut Lalsawmzela'n chance ṭum hnih a rawn nei a, a khung lo ve ve.
Mizoram captain Rinchhana leh Lalmuanawma (Munez) ten tlarhnung an ho ṭha a, Nagaland lakah kim lo chungin point thum hlu tak an hlawh chhuak.
Eng nge an sawi?
Mizoram manager K. Lalenghluna chuan, "Kan player-te thawhrim rah kan seng a, player 10-a an khel chungin ṭha takin an khel tluan thei a ni. Kan naute field chhung leh pawna an chet danah ka chhuang takzet," tiin Vanglaini a hrilh a, Hriata red card chu a dik loh hul hual thu a sawi bawk.
Mizoram team hi coach Samson Ramengmawia leh assistant coach HC Zarzoliana ten an enkawl a, final round lut turin Manipur lakah point hlawhchhuah an la mamawh.
Group B - Thlirna Tawi
November 28, Pathianni
Manipur 3 - 0 Nagaland
MAN : Salam Johnson Singh 25', 56'; Sudhir Laitonjam 53'
Mizoram 1 - 0 Tripura
MIZ : Lalhriatpuia 42'
November 30, Thawhlehni
Manipur 0 - 2 Tripura
TRI : Manajit Singha Barua 42'; Bikash Tripura 90+3'
Nagaland 0 - 1 Mizoram
MIZ : Lalnuntluanga Bawitlung 44'
December 2, Ningani
Tripura 9:30 AM Nagaland
Manipur 2:00PM Mizoram