Sheffield-ah McGoldrick a khel zel dawn

Season thara Champions League khelh beisei Sheffield United striker David McGoldrick chuan Blades (Sheffield sawina) tan rinawmna thu a tiam a, kum 2022 nipui thleng khel turin contract thar a ziak. 

Kum 32 mi McGoldrick hian season hmasa khan Championship-ah match 45 khelin goal 15 a khung a, league-a pakhatna nichunga Premier League an inhlankai theih nan player thawhhlawk a ni - Sheffield United Player of the Year-ah season hmasa hian an thlang. 

Republic of Ireland international hian Premier League an inhlankai hnuah erawh beisei a phak lo a, league match 21 khel tawhin goal a la khung miah lo!

McGoldrick chuan, "Kum hnih lo awm leh tur hi hmun danga hman ka duh lo a, Sheffield tana rinawmna thu ka tiam thei hian minti lawm takzet a ni," tiin a sawi. 

Kar hmasa khan Sheffield captain Billy Sharp leh vice-captain Oliver Norwood te chuan contract thar an lo ziak tawh bawk. Kum 34 mi Sharp hian kum hnih chhung atan a ziak a, Northern Ireland midfielder Norwood hian kum thum dang khel turin a ziak thung.