Hei le; A thleng ngei dawn e?

July 7, Vanglaini infiamna huanga kan thuziah chu, "England tan kawng zau taka hawnin a awm?" tih a ni a, Three Lions tan World Cup final kalkawng chu ṭum dang aia a 'awlsam' thu sawina a ni.

England-in chu kawngka zau takah chuan an ke an pen lut a, an hun neih ṭhat an khawhral duh lo. Three Lions hian Inrinni zan khan Sweden chu World Cup quarterfinal-ah 2-0 in an hneh a, 1990 World Cup hnua a vawi khat nan World Cup-ah semifinal an lut.

Three Lions tan Harry Maguire leh Dele Alli ten goal khat ve ve an khung a, Sweden-in hun tawp thlenga a chhanletna tur an neih loh avangin England an chak. "A lo thleng ngei dawn e," tiin England fans an lam a, 1966 hnua a vawi khat nana world champion nih an beiseina chu chhem nunin a awm zel.

England hian Nilaini zanah Croatia nen semifinal an khel dawn a, hnehna an chang a nih chuan France leh Belgium inkhela chak zawk chu an hmachhawn tur a ni dawn–champion turin match hnih chak chiah an mamawh ta.

Beisei phak lo

Inkhel ṭantir lam aṭangin team pahnih inkhelin beisei a phak lo a, World Cup quarterfinal meuh atan chuan match hmuhnawm tia sawi tur a ni lo. Player naupang rual awmna England-in pressure an la zo lo niin a lang a, ball pass sual leh tihsual an ngah a, goalkeeper Jordan Pickford hmuh tur a awm leh ṭhin.

Vanneihnain England a malsawm nawn a, khel ṭha lo chungin minute 30-naah goal hmahruai an khung–he goal khungtu hi Maguire a ni a, Ashley Young corner aṭanga ball lo kal chu a tauh lut. Leicester City defender Maguire chu he ball tauh lut tur hian a tlan ṭha a, corner pettu Young chu fak tlak a ni bawk.

England coach Gareth Southgate-a'n set piece pet an zir nasat thu a sawi a, an thil zir an hlawhtlinpui leh pui loh thuah zawhna a awm thei tawh lo–Maguire-a'n goal a khung chiah khan Russia-a set piece aṭanga goal an khung vawi riatna chiah a ni. England hian goal 11 an khung tawh.

Three Lions-in goal an khung hnuah an zia sawt a, defensive game-a innghat Sweden-in loh theih loha an nawr a ngaih bawk avangin inkhel a danglam. Sweden-in an beisei goal an zawng hmu thei lo a, minute 58-naah England bawkin an khung–player tlan tam leh taima Jesse Lingard cross ball chu Alli-a'n ṭha zetin a tauh lut.

A hming chu Pickford

England-in World Cup squad an puan hmaa goalkeeper thlan tur an neih chu Joe Hart, Jordan Pickford, Jack Butland leh Nick Pope te an ni. Hart hnawl a nih hnuah keeper pathum aṭangin Pickford chu si ban nghah tir a ni a, Southgate-a'n duh a thlan sual loh zia a lang chiang tawlh tawlh.

Everton goalkeeper hian last 16-a Colombia an hneh ṭumin penalty shootout-ah Carlos Bacca pet chu ṭha zetin a dan sak a, Sweden beiseina tihtawp saktu pawh Pickford a ni. Kum 24 mi goalkeeper hian 1-0 a hma an hruai laia Marcus Berg-a tauh luh ngei tur nia lang chu ṭha zetin a dan sak.

Pickford hian Viktor Claesson pet goal ngei tur nia ngaih chu ṭha zetin a dan sak bawk a, Berg chu vawi khat dang a hlawhchham tir bawk–a tawi zawnga sawi chuan England tlarhnung an ṭhian hnuah pawh Pickford a awm miau avangin Sweden-in goal an khung thei lo.

England goalkeeper chuan, "Kan ramin World Cup semifinal an luh hnuhnun berah khan a pian pawh ka la piang lo. Thawnthu thar ngaihnawm tak kan ziah theih hi kan beisei fo a ni," tiin semifinal an lut chu a hlim thu a sawi.