Coimbatore-ah Mizo riders che ṭha

India ram chhunga inelna ngaihhlut pakhat JK Tyre FMSCI National Racing Championship vawi 21-na round 1 tlan zawh takah Motorsports Association (MiMSA) tirh a kal Suzuki Gixxer Cup leh Red Bull Rookie Cup a inlan te an che ṭha hle.

Inelna hi July 6-8, 2018 khan Kari Motor Speedway, Coimbatore-ah neih a ni a, Rookie Cup-ah Zothanmawia, PC Andy Lalhmangaihsanga leh Jerome Vanlal­reng­puia bakah Malsawmdawngliana (Gixxer Cup) te chuan podium an lawn phak.

JK Tyre FMSCI National Racing Championship hi hlawm liah neih tawh tur a ni leh dawn a, tun tuma mi hi a bul ṭanna chauh a la ni. August 31 - September 2 leh October 12-14 chhung hian Coimbatore-ah tho second leh third round neih tur niin, November 16-18 hian Buddh International Circuit, Delhi-ah a hmawr bawkna neih a ni ang.

Rookies Cup

Inrinniah intlansiak thawhkhathatna neih a ni a, Zothanmawia chuan minute 14 leh second 23:901 chhunga lap 10 tlan zoin pakhatna a ni a, Venghlui rider hnungah hian Hmangaihsanga (14:47:163) leh Rengpuia (14:50:264) te an thleng bawk.

Pathianniah ruah a sur avangin intlansiak tir lamah 2.200 km a thui tlankawng a huh a, rider-te fimkhur taka intlanpel an tum chu inelna tihmuhnawm leh ngaihnawmtu pakhat a ni thung.

A tir aṭanga bul tán fuh Zothanmawia bawkin hnehna a chang leh a, pakhatna ni tur hian minute 14 leh second 36:129 a mamawh. A hma ni ang thoin a hnungah Rengpuia leh Hmangaihsanga te an thleng. Mizo rider dang Samuel Lalrinsanga (4pos) leh Lalramthara Sailo (6pos) te erawhin podium an lawn phak lo.

Kum 16 chin hnuai lam tlanna RedBull Rookie Cup champion hi India aiawhin Spain-ah Red Bull Rookie Cup-ah an inlan dâwn. He inelna hi MotoGP rider thenkhat - Jack Miller, Dani Pedrosa leh Johann Zarco te pawhin hming an lo chher tawhna a ni.

Gixxer Cup

JK Tyre Suzuki Gixxer Cup champion nomawi kawl mêk­tu Joseph Matthew chuan pa­khat­na dinhmun luah lehin, Chennai rider hnung chiahah hian Malsawmdawngliana a thleng - Mizo rider in a phak lohna hi second thum chauh a ni!

Pathianniah Malsawmdawng­liana a tla hniam hret a, pathumnaah a thleng. Mizo rider hmaah hian Matthew leh Bangalore rider Syed Mugamil Ali te an thleng a ni.

Gixxer Cup tlan tur hian qua­lifying paltlang hmasak a ngai a, nikuma inlan tawh Malsawm­dawngliana chu tling sâ a nih bakah Anthony Lalawmpuia te an tlan. Inelna hmachhawn tur hian rider 120-in qualifier an tlan a, heng zinga pakua chiah thlan thar an ni. Gixxer Cup-ah hian inlan turin kum bithlaih a awm awm lo a, lawmman atan bike leh pawisa a ni.

Eng nge an sawi?

Vanglaini zawhna chhangin JK Motor­sports head Sanjay Sharma chuan, "India ṭhalai tam tak motorsports-ah an tuihal a, chung zingah chuan Mizo thalaite pawh an tel. Mizo rider ten theihna an nei sang tih kan hria a, ṭun tumah pawh an lantir leh a ni. Chutihrualin thui tak thleng tur erawh chuan a bul ṭhut a fuh a ngai a, racing luhchilh hma a ngai bawk, " a ti.

MiMSA vice president Lalfakzuala Hauzel chuan, " Kan nau ten hma an sawn zel a, tun aia thui pawh an thleng thei ang. Kan thlen chinah kan lawm a, chutih rualin hma sawnna tur kan la nei, " tiin Vanglaini a hrilh bawk.