PSG goalkeeper thar Buffon

Paris St-Germain chuan Juventus leh Italy goalkeeper hlui Gianluigi Buffon chu free transfer-a an lakluh thu an puang a, kum khat chhung atan contract an ziahpui. Kum 40 mi goalkeeper hian a khelh ṭhat chuan thla 12 dang atan a contract hi a pawtsei thei ang.

Serie A-a vawi kua ngawt champion tawh Buffon chuan, "PSG leh fan-ten an thinlunga an duh ber hi ka hria a ni. He club-in hmachhawp a neih zawng zawngte ti hlawhtling tur hian ka theihna zawng zawng leh tawnhriat zawng zawng nen ka ṭangkawp dawn a ni," tiin a sawi.

Juventus-a kum 17 khel tawh goalkeeper chuan, "A vawi khat nan Italy chhuahsanin ka inkhel dawn a ni a, hetiang ti tura min hmin tur chuan PSG hmachhawp hi a duhawm em em a ni," a ti.

Khawvela goalkeeper ṭha ber pawla sawi hian Italy tan match 176 khelin World Cup 2006-ah a champion pui a, Serie A-ah vawi kua ngawt a champion chungin Champions League-ah erawh final vawi thum lut tawhin a la champion lo thung.