Aijal Club Challenger atan player lilam

Mizoram Tennis Association (MTA) hnuaia tennis inelna sang ber Aijal Club Challenger Tennis League atana player lilamna chu Inrinni zan khan Aijal Club conference hall-ah neih a ni a, All India Tennis Association (AITA) hruaitute pawhin he hun hi an hmanpui a ni.

MTA hian Aijal Club leh ZONET cable TV nenṭangkawpin inelna hi an buatsaih a, lilam zan hian team pangain player pakhat ṭheuh an lalut a, player pakhat hi Rs. 4,000 aṭanga chhan ṭan theih a ni. USA aṭanga inzir chhuak Basil Khuma chu K-12 Acers-in Rs. 50,000 in an lei a, player manto ber a ni.

Aijal Club Bulls-in inelna hnuhnung bera champion Lalhmachhuana chu Rs 37,000 in an lalut ve bawk a, ani hi Mizoram number 2 a ni. Zarkawt Xennons chuan Mizoram number 1 nilai Innocent Lalrindika chu 30,000 in an lei ve bawk.

Aizawl Acers chuan state pawn player awmchhun Chandra Sekhar Mohanty (Assam) chu Rs 7,500-in an chang a, ATC Love All lamin K. Lalrinawma chu Rs. 6,000 in an chang ve bawk. Rinawma hi Mizoram number 1 hauh reng tawh ṭhin a ni.

Aijal Club Challenger Tennis League hmasa ber chu August 11, 2018 hian Aizawl Tennis Court-ah khelh ṭan tur a ni a. Inelnaah hian category paruk mens, mixed double, 35+, junior, ladies leh open a khelh tur a ni dawn. Team pakhatah hian players panga aṭanga 10 an awm thei dawn a, MTA registered player pathum tal ziahluh tur niin player pakhatin category hnih an khel thei ang.