Belgium golden generation-in Brazil an vel

Belo Horizonte-a mittui hruk hul tumin Brazil-in Russia an pan a, Tite hnuaia an beiseina chu Belgium golden generation lakah a thamral. Germany laka 7-1 zeta an mual­pho ṭumin semifinal an thleng thei a, vawi nga champion tawh Selecao hian tun ṭumah quarterfinal chauh an thlen theih avang­­in mualpho nawnna anga chhal theih a ni.

Zirtawp zan khan Kazan-ah Belgium-in semifinal thleng turin Brazil 2-1 in an hneh. Manchester City midfielder Fernandinho chuan minute 13-na lekah an lamah tilutin Belgium-in hma an hruai a, Kevin De Bruyne chuan minute 31-naah Red Devils goal hnihna khung belhin second half minute 76-naa Brazil tana Renato Augusto tauh luh chu scoreline timawitu chauh a ni.

Neymar a tlu

Football khawvela record nei ropui ber, World Cup-a team hlawhtling ber Brazil an tla a, Lionel Messi leh Cristiano Ronaldo te hnungzuiin player ropui Neymar pawh a tla tel.

Kumin inelnaah a tir lam aṭang tawhin Brazil hi an ropui hran lo. Switzerland an draw bakah Costa Rica hneh turin injury time an mamawh a, talent nei ṭha Belgium laka an tlawm hi 'upset' a ni lo.

Quarterfinal thlen nan Neymar a thiam tih hai rual a ni lo a, nimahsela ṭul lo tak taka a tluk chiam chiam avangin internet khawvela fiamthu thawhna a ni a, entawntlak loa a khawsa hian referee thu­tluknaah pawh nghawng a awm niin a lang.

Goal hnihna an hnufual hnuah Neymar hian Belgium box chhungah Marouane Fel­laini pal luiin a tlu der a, referee-in thutlukna dik siamin penalty pe lo mah se yellow card a pe tel lo erawh PSG forward a vannei hle.

Minute li hnuah Gabriel Jesus chuan mawi taka la lutin City tana a khelhpui Vincent Kompany chuan chiang takin a titlu a, ball a kal chak deuh nachungin penalty pek theihna tur a ni a, referee-in penalty pek a tum chuang lo. Football thiam vanga hming chher tawh Alan Shearer leh Jurgen Klinsmann te chuan penalty turah an ngai a, referee thutlukna erawh an hriatthiampui, Neymar-a tluk der nasat vangah an ngai hmiah.

Brazil an chul

Brazil tlak chhanah erawh an vanduaiah a chhal theih. Tlarhnung pui tura defensive midfielder an neih ṭhat ber Casemiro chu hrem vangin a inlan thei lo a, Real Madrid midfielder aia lut Fernandinho-a'n a thlak zo lo. Manchester City midfielder hian midfield a thunun thei lo a, an lamah a tilut bawk.

Selecao-in right back-ah Dani Alves an nei a, Barcelona defender hlui hian inhliam vangin Russia a pan thei lo. Tawnhriat nei ṭha Dani Alves thlakna chu City right back Danilo a ni a, ani pawh hi inhliam vanga chhawr theih a nih loh avangin Corinthians right back Fagner chhawr a ṭul. Kum 29 mi Fagner hian Premier League player ṭha ber zinga mi Eden Hazard a veng hneh tawk lo a, Brazil tlarhnung a phui tawk lo.

Tite-a hnuaiah Brazil-in harhtharna an chang a, amaherawhchu World Cup nomawi hawn tur khawp chuan tun hma angin an squad a chhah tawk lo. Khawvel player manto ber Neymar an kawl nachungin a thlawptu tur Gabriel Jesus leh Roberto Firmino ten ram tan tawnhriat an la ngah tawk lo a, Philippe Coutinho-a'n a thiamna a pholang nachungin mamawh chhanna a ni bik lo.

Coutinho hian substitute Renato Au­gus­to tauh luh tur ṭha takin a siam a, amah­erawh­chu siphurh sut theihna hun ṭha a neihah Barcelona midfielder hian Neymar hnen aṭanga a ball hmuh ṭha zet chu goal zawnah a pet thei lo. Goal khungtu Renato Augusto pawh hi 2016 Summer Olympics-a Brazil champion puitu zinga mi ni mah se kum 30 mi a ni tawh a, Chinese club Beijing Guoan tana khel a nih bawk avangin a vanglai a inher liam chhoah a ngaih theih.

Brazil pawh hian kum 2002 hnuah World Cup nomawi an la chawi leh lo a, Copa America-a an champion hnuhnun ber pawh kum 2007 daih tawh kha a nih avangin football thiam ram hi la thiam reng mah se World Cup hnuhnung paliah Belgium, Germany, Netherlands leh France te an hneh loh avangin tun hma angin an chungnung tawh lo tih a nemnghet.

Tite-a hmalam

Brazil boss Tite chuan, "Ball in pass ṭha tak tak te, goal chance ṭhahnem tak te a awm avangin inkhel hmuhnawm tak kan chhawp chhuakah ka ngai a, amaherawhchu keini aiin Belgium khan an chance ṭha neih an hmang ṭha zawk a, chu chu an chak puiah ka ngai. Player ṭha tak tak an nei a, chung zingah chuan an keeper Thibaut Courtois chu inkhel tidanglamtu zinga mi a ni," tiin an nawr na tih pholan nan Belgian keeper a fak.

Tite chuan sawi chhunzawmin, "Kan rilru natna zawng zawng hi dah ṭha ila, football hmangaihna mita aṭanga kan en chuan Belgium nena kan inkhel khan lawmna a pe ang che u. Hrehawm kan la tih avangin ka hmalam hun chungchang erawh ngaihtuah ka la duh lo a, kar hnih vel han liam se rilru na te a dam fel hunah ka hmalam hun chungchang ka ngaihtuah ang," a ti. Brazil coach a ni zel dawn em tih a la hriat loh.