Russia tel lohna World Cup a ni ta!

World Cup 2018 thlengtu Russia-in minute 120 chhung Croatia in­hnehtawkpui mah se penalty-ah an vanduai a, a vawi khat nana World Cup semifinal khelh an tumna chu a thamral ta.

Russia tan Denis Cheryshev-a'n goal hmahruai a khung hnuah Croatia-in Andrej Kramaric hmangin an chhanglet a, minute 90 chhung goal dang a luh loh avangin extra time khelh a ni.

Minute 100-naah Domagoj Vida-a'n Croatia hmahruaina goal khung ve leh mah se Russia-in Mario Fernandes hmangin an chhanglet leh a, penalty hmanga chak zawk zawn a ngaih phah.

Russia beiseina siam tura si phurh suttu Mario-a'n penalty-ah erawh Russia tan a pet goal thei lo a, Fedor Smolov-a'n a pet goal loh ve bawk avangin penalty shootout-ah 4-3 in an chak lo.

Inkhel hmuhnawm

Inkhel ṭantir aṭangin Russia an tlan tam a, Croatia player-te taimakna hmuh hmaih theih a ni bik lo. Player aṭanga tehin Croatia chu chak tura beisei an ni a, mahse Spain pet chhuak­tu an nih miau avangin Russia dah hniam erawh a harsa.

Minute 31-naah Russia-in goal mawi min hmuh tir nghal. Cheryshev chuan box pawn aṭangin Croatia goal chung kil sirah mawi zetin a thlawh lut a, Croatia keeper ṭha Danijel Subasic meuh tan pawh mawi ti taka thlir bak tih theih a awm lo.

Russia hlim chhung erawh a rei lo. Goal an khung aṭangin minute riat a liam hman chauh tihah Andrej Kramaric chuan Russia defending 'tight' tak karah a tauh lut a, Mario Mandzukic siamsak a ni. Goal dang erawh kan hmu lawk lo a, Croatia-in substitution pathum an siam hnuah keeper Subasic inhliam vangin an hlauthawng hman a, Monaco keeper hi khel chhunzawm thei hlauhin extra time-ah pawh thlak a ngai lo. Kumin World Cup aṭangin extra time-ah substitution pakhat siam belh theih a ni a, minute 120 chhungin player pali a thlak theih tihna a ni.

Croatia tan minute 100-naah Vida chuan an goal hnihna a khung a, extra time a nih tawh avangin an chak tawhah a ngai a, a kawr phelh chungin a goal khung a lawm. Mahse, Russia an awm mai mai bik lo - Alan Dzagoev free-kick aṭanga ball kal chu Mario-a'n a tauh lut a, semifinal lut tur zawn nan penalty a ngaih phah.

Mangṭha Russia

Penalty pet a ni a, Fedor Smolov-a'n panenka hmanga chhuih luh a tum chu Subasic tan dan harsa a ni lo. Mahse, Igor Akinfeev-a'n Mateo Kovacic pet a dan ve leh avangin Russia an vannei nawn dawn niin a lang. Beisei ang erawh a ni lo - extra time-a si phurh suttu Mario-a'n a huaisenna zawng zawng nen goal zawnah a pet thei lo.

Brazil-a piang Mario hi hero aṭangin zero-ah tla thla mah se dem nghawt thei a ni lo. Croatia captain Luka Modric pawh a zam takzet a, Real Madrid midfielder pet chu keeper Akinfeev tan dan theih tur ni mah se a khawihfuh hnuah goal-ah a lut ta tho. A tawpah Croatia tan Ivan Rakitic bawk rawn pen chhuakin Denmark laka cool taka chakna goal khungtu hian cool tak thoin Russia lamah chakna goal a khung.

Inrinni zan inkhelah hian Russia fan-ten banner lian tak an keng a, "Nangin i tih lohin tuin nge ti ang? Tunah a nih lohin engtikah nge ni ang?" tiin banner nen zawhna an siam a, an ram ngeiah a sang thei ang ber thlen an duh.

Mahse, he Russian team hian huaisen taka an khel chungin semifinal an lut thei ta lo - an thlen chinah erawh lawm tur an ni. World Cup hma khan Russia hi FIFA ranking-ah 70-na an ni a, World Cup khel zingah ranking hniam ber an ni a, beisei a sang lo.

Russia boss Stanislav Cher­che­sov chuan, "Mipuite hian kan chung­ah rinna an nghat ve ta a ni mai lo a, he team hi an hmangaih tawh a ni. Vawiina kan vanduaina hi thil duhawm zawk bul ṭanna a nih ka beisei," a ti a, an thlen chinah a lawm.

Croatia - golden generation?

Khawvelin Belgium golden gene­ration an sawi vul chuk a, chumi kara an theihnghilh chu Croatia golden generation hi a ni. Kum 1998 hnua a vawi khat nan semifinal an lut a, nomawi an chawi thei ang em, tih chu zawhna a ni ta.

Hriat hmaih thiang lo chu he team-a player langsar tam zawk hi football khel tura kum upa tawh lam an ni a, Russian fan-te zawhna, "Nangin i tih lohin tuin nge ti ang? Tunah a nih lohin engtikah nge ni ang?" tih hi Croatian team inzawhna tur zawk niin a lang.

Russia laka khel ṭha leh tlan tam, tun inelnaa an innghahna Real Madrid midfielder Luka Modric hi kum 32 mi a ni tawh a, Barcelona midfielder Ivan Rakitic (30), Juventus forward Mario Mandzukic (32) leh Inter Milan forward Perisic (29) te an naupang chhe tawh lo bawk - tunah a nih lohin engtikah nge major tournament-ah an champion ang?

Croatia-in semifinal an lut tih a chian ruala lawm avanga mittui sengtu, Croatia boss Zlatko Dalic chuan, "Match hnih kan la nei a, kan phur hle. Kan theihna zawng zawng kan pe dawn a, harsa dawn mah se ka naute ka ring tawk a ni," a ti a, match khat niloin match hnih hmabak an neiah a inngai.