Djokovic-a'n British beiseina titawp

Wimbledon-a vawi thum champion tawh Novak Djokovic chuan Inrinni khan British number one Kyle Edmund chu 4-6, 6-3, 6-2, 6-4 in a hneh a, inhliam vanga Andy Murray a inhnuhdawh tawh bawk avangin round of 32-ah British beiseina a tawp nghal. Zanin hian Djokovic-a'n Russian star Karen Khachanov a hmachhawn leh ang.

Grand Slam a dang

Kum 23 Edmund hi seeded number 21 a ni a, last 32 thleng tur hian harsatna nei loin Alex Bolt leh Bradley Klahn te a hneh . Player pahnih hi ranking 50-na chunglam chauh ni mah se Edmund hian May thla khan Djokovic hi Madrid Open-ah a hneh a, hei vang hian world number one hlui laka a vanneih theih an beisei hi a mak lo.

Amaherawhchu Grand Slam a dang a, Wimbledon phei chu grass-a khelh a nih avangin a dang lehzual. Edmund-a'n Djokovic a hnehna Madrid Open erawh clay court a nih bakah set thum lek khelh a ni a, tun ṭumah chuan set nga khelh a ni tawh.

Edmund-a'n set hmasa ber chu 6-4 in la mah se a hnu lamah erawh Djokovic thiamzia a lang. Kum 2007 hnua a vawi khat nan Wimbledon inelna ṭan aṭanga kar hnihna lekah British singles player hmuh tur an awm tawh lo.

Edmund chuan, "Inkhel thlir let chuan nawr na deuh ilang chuang tih tein ka rilru a inkhap a, amaherawhchu a tak takah chuan a sawi a sawi leh a taka tih chu a dang a ni," tiin a harsat thu a sawi.

Djokovic nge nge

Serbian Djokovic hi thla ruk zet kiu hliam vangin a chawl a, ranking-ah pawh a hniam phah. Hemi hnu hian Djokovic hian beisei a pha ṭhin lo.

Wimbledon-ah erawh Djokovic-a'n American Tennys Sandgren leh Argentine Horacio Zeballos te straight set-in a hneh ve ve a, khawtual tlangval Edmund-a hneh leh tak avangin seeded 12-na chauh ni mah se champion beiseiawm zingah a tel ang.

Kum 31 mi Djokovic chuan, "Tennis inkhel quality sang tak a ni a, kan inthlauhna kha chhe te chauh a ni," tiin Edmund-a khelh a harsat thu a sawi.

Mipui chungchang sawiin Djokovic chuan, "A chang chuan Davis Cup (ram inelna) ang mai a ni a, Kyle an ṭan dawn tih chu hre bawk mah ila a chang kha chuan an ti mah mah deuh chu ka ti. Ball ka vawm sawh lai thlengin an fai fuk a, thawm bengchheng an siam a, hun hman tur chen aia rei ka hmang hial a, kha vang tak khan an chet dan kha ka duh lo a ni," tiin a lawm loh thu a sawi lang.