Juventus hmachhawn tur Napoli

Thla thum chhung an chawlh hnuah Italian football chu a lo kir leh ta. Cristiano Ronaldo-a penalty hlah tukah Inter Milan midfielder Christian Eriksen-a'n corner aṭangin a chhuihlut a, inkhel hmuhnawm en tur an chhawp chhuak leh nghal.

Coppa Italia semifinal khelh chhunzawm niin Juventus leh Napoli ten final an lut. Nilaini zan dar 12:30 hian Stadio Olimpico, Rome-ah nomawi inchuhna an nei zui leh nghal ang.

Zirtawpni zan khan Juventus leh AC Milan te goal awm loin an inhnehtawk a, an intawn hmasakah 1-1 in an inhnehtawk; away goal rule hmangin khualmuala goal khung zawk Turin club an tlang ta zawk a ni.

Napoli leh Inter Milan te Inrinni zanah an intawng zui a, si khat faia hma hruai sa chungin Napoli lamin mikhual an thleng. Naples khawpuiah 1-1 in an inhnehtawk, inkhel pahnih belhkhawmah Gennaro Gattuso naute 2-1 in an tlang

Turin khawpuia inkhelah Juventus chu tlang tura rinkai zawk ni mah se a awlsam vek bik lo. Minute 15-na lekah AC Milan defender Andrea Conti-a handball vangin penalty an hmu a, forward Ronaldo rawn ding chhuakin goal ban a pet per.

Penalty an hmuh aṭanga minute hnih hnuah forward Ante Rebic chu Danilo nen ball kang an inchuhnaah a ke a lek san leh hlauhawm vangin hnawhchhuah a ni a, goal mamawh Milan tan chanchin ṭha lo a ni. Player kim lo, striker Zlatan Ibrahimovic chhawr thei lo bawk hi an tho chhuak lo.

Maurizio Sarri enkawl Juve lamin inkhel thunun mah se first leg ang bawkin goal khung an harsat. Milan keeper Gianluigi Donnarumma-a'n Blaise Matuidi leh Paulo Dybala te khung tur ṭha taka dangin beiseina siam mah se goal an neih theih loh avangin Turin club zawk an tlang.

Juve-in an mikhual lakah goal an khung thei lo a, an in tawn vawi hnihah Milan player ṭum hnih hnawhchhuah niin, manager Maurizio Sarri nau ten penalty vawi hnih an hmu thung. Harsa leh vannei takin final an lut hram a ni.

Sarri chuan, "Thla thum a liam hnuah kan inkhel leh thei ta, fans awm loa inkhelh chu a khawharthlakin a harsa takzet. Chutihrualin khelmual kan lut leh thei ta ringawt pawh hi a lawmawm, lawmna tur lai kan zawng a nih chuan hun harsa karah pawh a awm zel.

"Player an inkhel lo rei a, chumi hnuah match neih chu a awlsam lo ang tih chu hriat sa a ni. A tir lam minute 30 chhung erawh inkhel thunun chungin kan khel ṭha hle, a hnu lamah erawh kan talbuai. A pawimawh ber chu final kan lut hi a ni a, a dang chu siamṭhat theih a ni," a ti.

February 12 khan San Siro-ah mipui 60,000 vel bawr an pungkhawm a, midfielder Fabian Ruiz goal hmangin Lazio chuan Inter Milan 1-0 in an luhchhuah. Antonio Conte enkawl Inter tan final lut turin goal khat aia tam khung ngei a ngai tihna a ni.

San Paolo Stadium-ah Inter lamin bul an ṭan fuh, minute hnihna lekah Eriksen-a corner pet chu Napoli keeper David Ospina chuan holam angreng takin a chhuah a, team pahnih dinhmun chu 1-1 a ni chiah.

Napoli lamin chawlhlawk hma deuhin mamawh chhanna an hmu, counter attack hmanga na taka an nawr hnuah Lorenzo Insigne siamsak chu forward Dries Mertens-a’n a khung - club tana a goal 122-na niin, goal khung hnem record a chelhpui Marek Hamsik a khum.

Serie A lamah beisei angin Napoli an che fuh tawk lo a, season kal laiah chuan Coppa Italia hi nomawi chawi theih an beisei awmchhun a ni. 2014 hnua a vawi khat nan champion leh an tum dawn.

Arsenal keeper hlui Ospina-a'n a tihsual vangin dinhmun hlauhthawnawmah an ding zet a, a hnuah erawh Colombian international hian a tihsual hliah khuh nan Romelu Lukaku, Antonio Candreva leh Eriksen te goal khung tur chu ṭha takin a dansak vek.

Gennaro Gattuso enkawl Napoli hian final-a an hmachhawn tur Juve hi league lamah chuan point 24 zetin an phak lo mek a, cup inelnaah erawh an zam bik lo ang. Minute 90 chhunga chinfel mai tawh tur a nih avangin anmahni aia lian zawk lakah beisei an nei dawn.