Zanin dar 11:30-ah World Cup semifinal hmuhnawm

FIFA World Cup-a la champion ngai lo Belgium-in an ṭhat vanglai takin France an hmachhawn dawn. Les Bleus hi kum 1998-a an ram ngeia nomawi chawipuitu captain Didier Deschamps-a'n a ho a, France champion puitu striker Thierry Henry chu Belgium assistant coach a ni thung.

Zanin dar 11:30 hian FIFA World Cup semifinal hmasa zawk chu Saint Petersburg-ah khelh a ni dawn a, football-a tehna pawimawh hrang hrang thlirin zanina France leh Belgium te inkhel tur sawifiah dan tawi chu 'a hmuhnawm dawn' tih hi a ni.

French Revolution

France-in semifinal thleng turin Luis Suarez telna Uruguay an hneh a, South America aiawh hian Les Bleus hi ṭan phat aṭangin hneh tur angin an lang lo hrim hrim.

Didier Deschamps khan 'chak loh pumpelh' tumin risk la duh miah loin team a rem khawm a, hei hi Uruguay an hneh dan chauh ni loin tun World Cup-a an khelh dan hmang chu a ni.

France-in VAR - penalty leh goalline technology - own goal hmangin Australia 2-1 in an hneh hram a, Peru 1-0 a an hneh ṭum pawhin inkhel an thunun chuang lo. Group match hnuhnung bera Denmark nen an inkhelh ṭum phei chu tun inelnaa goal luh lohna awmchhun leh inkhel hmuhnawm loh bera chhal a ni.

Amaherawhchu France hi Argentina nen an inkhelh ṭum chuan an dang a, Lionel Messi telna team hi 4-3 in an hneh. Goal li khung thei Les Bleus an hmuhnawm a, Deschamps erawhin an tlarhnung pawp a hmuh hmaih lo.

Quarterfinal-a Uruguay nen an inkhelh ṭumin goal venhim ngai pawimawh thar lehin tun inelnaa a vawi thum nan an clean sheet a, Euro 2016 best player Antoine Griezmann chuan open play aṭangin goal a khung ta bawk.

France hian keeper ṭha Hugo Lloris an nei bakah defender ṭha Raphael Varane leh Samuel Umtiti te chu tlarhnung tiphuitu an ni a, Premier League star Paul Pogba leh N'Golo Kante ten an la pui bawk.

Tlarhma lam pawh an nei hrawl hle, Griezmann bakah tunlai rawlthar duhawm ber Kylian Mbappe, Ousmane Dembele, Blaise Matuidi leh Olivier Giroud te an la kawl cheu.

Kum 1998-ah tuna an coach Deschamps hian captain niin Paris khawpuiah ngei World Cup trophy a lo lek kang va va tawh. Tun ṭumah hian Euro 2016-a final lut team chu naupang ṭha rualin an belh a, Deschamps ngeiin a ho bawk nen 'French Revolution' tiin hming lem an vuah hial.

Rangkachak fiahna

2014 World Cup-ah Argentina hneh loin Belgium hi an tla. 'Golden Generation' tih ṭawngkam chuan nuihzat a hlawh deuh. Kum li hnuah erawh khami ṭuma starting eleven-a player pariat ngawt telna chuan champion rinkai Brazil chu vanneihna tel loin an hneh a, ṭum dang zawng aiin 'Golden Generation' tih hming chu a ri ring leh ta.

Belgium tan kum 1986 khan captain Jan Ceuleman leh veteran defender Eric Gerets hnuaiah kum 20 mi Enzo Scifo-a'n a thiamzia a rawn pholang a, an ram history-a a vawi khat nan WC semifinal an thleng hial.

Tun ṭuma mite hian media lamin 'The Original Golden Generation' an tihte thlen chin semifinal chu an thleng tawh a; hemi thleng tur hian Japan laka goal hniha an hnufual hnuah an lehthal thei a, rilru lam fiahna an patlang. Quarterfinal-ah champion rinkai Brazil hneh lehin an thiam tak tak tih an lantir leh ta bawk a, tunah chuan history siam chiah an hmabak ta.

Amaherawhchu an hmaa ding France hi 1986 WC khan pathumna inchuhnaah an hneh lo a, chuvangin Vincent Kompany, Eden Hazard, Kevin De Bruyne, Romelu Lukaku leh Thibaut Courtois te telna team hian 'Golden Generation' tih hi an phu reng em tih fiahin a awm dawn.

Tuna Belgium player-te en ila, super star tia sawi theih vek ni lo mah se, Brazilian aia ball thiam te, German tluk zeta chak te, African tharum nei te, European thluak nei bawk site an ni a. An coaching staff-ah hian Thierry Henry a awm a; French mihrang, World Cup champion dan hre tawh khan coach Martinez hi a pui a, Arsenal legend Barcelona tan pawha khel tawh hian Belgium mipui ngaih a ti ṭha dawn. Chutihrualin a a tawpah chuan World Cup trophy an hawn em tih hi a pawimawh ber chu a ni.