Canelo laka tlawm thei ka ni lo - Golovkin

WBA (Super), WBC leh IBO middleweight champion lai Gennady Golovkin chuan September 15-a a vawi hnih nana Canelo Álvarez nen an inhnek hunah tlawm thei a nih loh thu a sawi.

September 2017 khan figh­ter pahnih hi T-Mobile Arena, Las Vegas-ah an lo intawng tawh a, sawisel hlawh takin inhnehtawkah puan an ni.

Boxer pahnih hian May-a inhnek ṭha leh turin inremna nei mah se Canelo thisenah thil dik lo hmuh a nih avangin Mexican boxer hi thla ruk hrem a ni a, a inhnukdawk.

Mahse, June khan boxer pahnih inhmachhawn leh hun tur hi tihchian a ni ta a, Golovkin chuan judge thu­tlukna sawisawl hlawh awm nawn tir a tum lo.

Kum 36 mi boxer chuan, "Tlawm thei ka ni lo. Canelo hi boxer ṭha tak, champion rilru pu mi a nih avangin hmachhawn châk­­­awm tak a ni a, a hma aia ṭha­in ka inlan dawn a ni," ti­in Mexi­can boxer chu hneh a tum hle.

GGG (Triple G) tia hriat lar boxer hian professional bo­xing a luhchilh hnuah match 39 inlan tawhin vawi 38 a chak a, heng zinga vawi 34-ah hian a khingpui a knockout a, Canelo nen an intawn hmasaka an inhnehtawk tih loh kha chu chak zawh loh a nei lo.

Kum 27 mi Canelo hian fight vawi 52 a hmachhawn tawh a, vawi 49 chakin heng zinga vawi 34-ah hian a khingpui a knockout a, vawi hnih draw result neiin vawi khat a chak lo.

Mexican boxer-in a ngam loh awmchhun hi vawi 50 inhnek a hmachhawna tlawm miah lo chunga boxing chawlhsantu Floyd Mayweather Jr. kha a ni.