Spain coach thar Luis Enrique

Fernando Hierro-a'n Spain team a enkawl chhunzawm loh tur thu a tihchian hnu lawkah Spanish football federation (RFEF) chuan an coach thar an puang ve lehnghal a, Barcelona boss hlui Luis Enrique an lalut.

Hierro hi World Cup hmaa a hna ngai Spain football team sporting director hna chelh chhunzawm tura tih a ni a, mahse RFEF chuan an coach hlui hian 'chona thar' hmachhawn duha a hna ngai chelh chhunzawm loh a thlan thu an sawi.

Spain hian Atletico Madrid goalkeeper hlui Jose Francisco Molina chu sporting director ni turin an lalut tel nghal bawk a, Enrique hi kum hnih chhung atan contract an ziahpui.

Welcome Enrique
Spanish FA chuan thuchhuah siamin, "RFEF executive committee ṭhukhawm chuan inlungrual takin Enrique hi kan coach atan kan thlang a ni," an ti a, Barcelona coach hlui an lalut thei chu an lawm thu an sawi.

RFEF president Luis Rubiales chuan, "Enrique hian hmun dang aṭang pawhin sawmna itawm tham tak tak a dawng a, mahse national team enkawl a chak avangin kan chang thei a ni," a ti.

Enrique hi Chelsea nen hun rei tak sawi zawm an lo ni tawh a, mahse May 2017-a Barcelona a chhuahsan hnua team enkawl la nei lo hi karleh lamah Spain coach a nihna angin phochhuah a ni dawn ta zawk.

Enrique chauh lo chu
World Cup last 16 aṭanga Russia-in Spain an petchhuah hnuah Hierro-a'n Spain a enkawl chhunzawm loh rinna a awm nghal a, Real Madrid legend hmun ruak luah tur hian Belgium coach Roberto Martinez, Spain international hlui pahnih Michel leh Quique Sanchez Flores te hming lamrik a ni.

Mahse, Spanish FA hotupa Rubiales chuan, "Midang tumah kan dawr lo a, Enrique hi a tir aṭangin kan ram team kaihruai tura kan duh nghal chu a ni," a ti a, player a nih laia Spain tana vawi 62 inlan thei chuan an ram team a chet ṭhatpui a beisei.

Kum 48 mi manager hian Barca-ah season thum hun a hman chhungin inelna hrang hrangah nomawi pakua a chawi a, Catalan club-a a season hmasa berah hian treble champion hial a nihpui.